Sámediggi bovde gulahallančoahkkimii politihkalaš jođiheddjiid sámegiela hálddašanguovllu suohkaniin Finnmárkkus, vuorasolbmuid ráđi, muhtin báŋkohoavddaid ja penšunistaservviid jođiheddjiid seamma suohkaniin, Finnmárkku fylkasuohkana vuorasolbmuidráđi jođiheaddji, Sis-Finnmárkku Riekteveahkkekantuvra, Fefo ja "oahpu massán organisašuvnnaid" jođiheddjiid.
Mo buoredit dili
Čoahkkimis vuordit gullat makkár veahkkeortnegat leat suohkaniin go guoská lohkan- ja čállinveahkkái vuorrasiidda geat eai hálddaš nu bures dárogiela ja mo sáhtášii Sámediggi veahkkin oažžut johtui doaimmaid mat buoridit dili.
Vuoruhan vuorasatolbmuid
Sámediggi lea dán jagi bušeahtas vuoruhan ruđa oažžut johtui sierra veahki vuorasolbmuide suohkaniin gos leat ollu sámegielat vuorasolbmot geat soitet bártidit čálalaš ja njálmmálaš gulahallamiin sihke almmolaš ja priváhta ásahusaiguin.
Ovdamearkka dihte lea hástalussan ipmirdit reivviid ja čállosiid main adnojit amas doahpagat ja formálalaš giela mii spiehkkasa njálmmálaš gielas. Makkár veahki ožžot vuorrasat omd báŋkkuin, Sis-Finnmárkku Riekteveahkkekantuvrras ja Fefos?
Sierra vuorrasatolbmuid dieđáhus
Boahtte jagi mielde álggaha Sámediggi barggu vuorasolbmuidpolitihkalaš dieđáhusain, mii plána mielde galgá gárvvis 2012;s. Dan dihte livčče ávkkálaš diehtit maid vuorasolbmot ieža oaivvildit iežaset dili birra ja makkár veahkkefálaldagaid váillahit.
Áigi: Duorastaga 23.09.10 dii 12 - 16.
Báiki: Guovdageaidnu.
Čoahkkinlatnja: Diehtosiida; Allavárdu, 3. Geardi
Čoahkkin lea rábas pressii