Sámediggi áigu čuovvolišgoahtit sin geat leat álggahan sámi doaimmaid máttasámi guovllus maŋimus viđa jagis. Dát dáhpáhuvvá ovttas Nordlándda fylkkasuohkaniin.
Prošeavtta mihttomearri lea oahpahit oassálastiid mo sii sáhttet buoridit aiddo álggahuvvon doaimmaid gánnáhahttivuođa. Go doaibma álggahuvvo, de sáhttá váldit máŋga jagi ovdalgo fitnodagas lea badjebáza. Dakkár doaimmat ožžot menddo uhccán beroštumi sin bealis geat leat ruhtadan prošeavtta.
Olahusjoavkun leat sámi lotnolasealáhusdoallit Sáltoduoddara máttabealde geain leat sámi ealáhusat.
Nannet ássama
-Sámediggi lea vuoruhan ruhtadit ođđa doaimmaid, muhto dattetge lea leamaš deaŧalaš bisuhit ja ovddidit dálá doaimmaid ja nu sihkkarastit barggolašvuođa sámi guovlluin, dadjá sámediggeráđđi Marianne Balto.
Sámediggái lea deaŧalaš čuovvolit ođđa álggaheddjiid vai sihkkarastojuvvo ahte álggaheaddjit válljejit rivttes vugiid álggahanmuttus.
Čuovvoleapmi galgá dáhpáhuvvat čoagganemiid bokte. Galget leat golbma čoagganeami, juohke čoagganeapmi bistá guokte beaivvi. Fáddán leat gánnáhahttivuođa árvvoštallan, rehketdoallosuokkardeapmi, vuovdin- ja márkandilit, fierpmádatduddjon ja fitnodatovddideapmi.
Vuosttaš čoagganeapmi skábmamánus
Sámediggi lea bivdán oažžut fálaldagaid prošektii. Jáhkkimis lea ahte vuosttaš čoagganeapmi lea skábmamánus, ja dat earát čađahuvvojit 2011:s.
-Jus prošeakta lihkostuvvá, de áigu Sámediggi árvvoštallat čađahit sullasaš prošeavttaid eará sámi guovlluin ge, dadjá ráđđelahttu Marianne Balto.
Sámediggi bidjá eanet dieđuid čuovvolanbarggu birra min ruovttusiidduide.
Čađaha diehtojuohkimiid
Sámediggi lea doallan máŋga diehtojuohkinčoahkkimiid dán jagi Sámedikki váikkuhangaskaoapmeortnegiid birra máttasámi guovlluin. Ulbmilin lea leamaš oččodit eanet prošeavttaid máttasámi guovlluin.
-Mii doaivut ahte ollu álggaheaddjit servet čuovvolanbargui, dadjá sámediggeráđđi Marianne Balto.
Loga eambbo gilvvu birra: