Ráđđelahttu Vibeke Larsen deattuhii ahte sámi museain leat earálágan hástalusat go muđui eará museain Norggas. Museat leat viehka ođđasat, muhtumat áibbas easkka álggahuvvon, ja ain huksendásis, danne leat ollu vuođđo museadoaimmat ain deaŧalaš áŋgiruššansuorggit, ja danne ferte sámi museaid hástalusaid geahčadit diekkár perspektiivvas.
Son čujuhii dasto ahte sámi museat galget viidáseappot ovddiduvvot sámi árvovuođu vuođul, ja dat leat deaŧalaš ásahusat sámi kultuvrra ja identitehta nannema ja viidáseappot ovddideami oktavuođas.
Sámedikki rolla
Sáhkavuorustis čilgii Sámediggeráđi lahttu Vibeke Larsen mii lea Sámedikki rolla sámi museaid ektui Norggas.
Son čilgii ahte Sámediggi galgá bidjat fágalaš ja politihkalaš eavttuid sámi museaid ovddideapmái. Sámedikki bajimuš mihttomearrin sámi museaid ektui lea nannet ja oktiiordnet sámi museadoaimma ollislaččat, sámiid iežaset eavttuid vuođul go lea álbmot ja álgoálbmot.
Sámedikki politihkka museasuorggis váldá vuolggasaji International Council of Museums (ICOM) museadefinišuvnnas. ICOM ođastii 2007:s museadefinišuvnna, mii lea:
"Musea lea bissovaš ásahus, mii ii hága dietnasa, mii galgá bálvalit servodaga ja dan ovddideami ja galgá leat rabas olbmuide; mii čohkke, vurke/konservere, dutká, gaskkusta ja addá ávnnaslaš ja ávnnaskeahtes (kultur)árbbi olbmuid ja sin birrasiid birra dutkama, oahpahusa ja suohtastallama várás".
Sáhkavuoru ollásit sáhttá lohkat dákko.