Sámediggi lágidii gulahallančoahkkima lohkan- ja čállinveahki birra boarrásiidda Guovdageainnus duorastaga 23.09.2010.
Sámediggi háliidii gullat makkár veahkkeortnegat leat suohkaniin go guoská lohkan- ja čállinveahkkái boarrásiidda geat eai hálddaš nu bures dárogiela. Sámediggi háliidii maid diehtit mo sáhtášii Sámediggi leat veahkkin oažžut johtui doaimmaid mat buoridit boarrasatolbmuid árgabeaivve dili sámi guovlluin.
Eai dieđe bálvalusaid birra
Ollugat muitaledje čoahkkimis ahte eai álo dieđe makkár veahki lea oažžumis go almmolaš ásahusat eai álo leat nu čeahpit muitalit iežaset bálvalusaid ja veahkefálaldagaid birra.
Vuorrasat ledje ilus go ledje bovdejuvvon dákkár čoahkkimii ja sávve ahte Sámediggi boahtteáiggis ain doalaha singuin lagaš oktavuođa.
Sámedikki várrepresideanta Laila Susanne Vars lohká Sámedikki áigut áŋgiruššat háhkat eanet deaivvadanbáikkiid ja lagat gulahallama boarrásiiguin boahtte áiggis.
Sullasaš hástalusat.
-Boarrásiin dain viđa sámi suohkanin leat stuora ja sullasaš hástalusat. Sin dilli hedjona go almmolaš kantuvrrat sirdojuvvojit guhkkelii ja ii ge šat gávdno báikkálaš veahkki, go gulahallan ferte dáhpahuvvat juogo čálalaččat, telefuvnna dahje dihtora bokte. Ollu suohkanin ii leat šat báikkálaš veahkki go galgá diŋgot mátki buohccivissui dahje deavdit mátkerehkega go máhccet buohcciviesus, lohká Sámedikki várrepresideanta Laila Susanne Vars.
Čoahkkimis bođi ovdan ahte vuorrasiin leat stuora dárbbut čállin- ja lohkanveahkkái, ja sis lei sávaldat ahte juohke suohkanis galggašii leat okta dihto olmmoš gii sin sáhtášii veahkehit sin. Fastá olmmoš geainna besset oahpásnuvvat ja dovdat oadjebasvuođa. Eará sávaldagat mat bohte ovdán čoahkkimis ledje nuvttá bátnedikšun, jahkásaš dearvvašvuođaiskan, deaivvadanbáikkit vuorrasiidda suohkanin ja maiddái deaivvadanbáiki dain eará davviriika vuorrasiiguin.