Sámediggi beassá maiddái nammadit lahtuid friija vuođul. Ovdal beasai sámediggeráđđi dušše nammadit lahtuid lávdegottiide Sámedikki áirasiid gaskkas.
Ođđa láhkaásahusas lea Sámediggi ožžon čađa guokte ášši, main lea mearkkašupmi Sámedikki boraspirelávdegottiid nammademiide.
1. Boraspireláhkaásahus lea rievdaduvvon nu ahte golbma davimus regionála boraspirelávdegottit ožžot eanet sámi váikkuhanfámi dakko bokte go Sámediggi nammada guokte lahtu ii ge ovtta nu mo ovdal. Dát regiovnnat leat; regiovdna 6 Davvi-Trøndelága/Lulli- Trøndelága/Møre ja Romsdal, regiovdna 7 Nordlánda, ja regiovdna 8 Romsa/Finnmárku. Regiovdna 5 Hedmárku, doalaha ovtta sámi ovddasteaddji.
2. Rievdadusat láhkaásahusas mielddisetbuktet ahte ii šat gáibiduvvo ahte Sámediggi nammada lahtuid iežas bistevaš áirasiid dahje várreáirasiid gaskkas.
Ráđđelahttu Marianne Balto dadjá ahte sámediggeráđđi lea hui duhtavaš go láhkaásahus lea rievdaduvvon.
- Ráfáiduhttojuvvon boraspiret dagahit stuorra jahkásaš ekonomalaš vahágiid sávzaboanddaide ja boazoisidiidda. Lassin dasa ahte ekonomiija njiedjá boraspirevahágiid geažil, de dagahit dát vahágat olmmošlaš nođiid ealáhusdolliide geat gávdnet goddojuvvon ja gaikkoduvvon elliid. Danne lea deaŧalaš ahte sápmelaččat leat bures ovddastuvvon hálddašeamis.
Ráđđehusa jagi 2004 boraspiredieđáhusa oktavuođas ásahuvvojedje ođđa regionála boraspirelávdegottit. Dáin lávdegottiin lea hálddašanovddasvástádus iežaset regiovnna boraspiriin dohkkehuvvon nationála boraspirepolitihka rámmaid siskkobealde.
Sámediggi lea hui duhtavaš go Sámediggi beasai nammadit lahtu buot njealji davimus lávdegoddái. Sámedikki mielas lei dattetge moaittehahtti go Ráđđehus mearridii ahte Sámediggi oaččui ráddjejuvvon nammadanvejolašvuođa. Gáibiduvvui ahte Sámedikki lahtut galge leat Sámedikki bistevaš áirasat, dušše spiehkastagas galggai sáhttit nammadit dikki várrelahtuid.
Sámediggeráđđi jotkkii gáibidit ahte nu ii galgan leat eaktun, go lei váttis gávdnat evttohasaid geain lei regiovnnalaš čatnaseapmi ja seammás fuolahit sohkabealdássedeattu nammademiin. Sámediggi čujuhii maiddái dárbbu oažžut eanet sámi ovddastusa lávdegottiide. Danne lei illudahtti go Biras- ja ovddidanministtar Erik Solheim háliidii miehtat Sámedikki gáibádusaide ja álggahii dan proseassa ahte rievdadit njukčamánu 18. b. 2005-mannosaš láhkaásahusa nr. 242 boraspirehálddašeami birra (boraspireláhkaásahus).
Sámedikki lahtut lávdegottiin leat čohkkán guhkit go sin doaibmaáiggi, vuorddidettiin vejolaš rievdadusaid boraspireláhkaásahusas. Boraspireláhkaásahus lea mearriduvvon rievdaduvvot ja biddjojuvvot doibmii 17.09.2010 rájes ja Sámediggi áigu farggamusat álggahit nammadanproseassa.