Evttohuvvon lasáhus Sámi dáiddárráđi juolludussii addojuvvo doaibmadoarjjan sámi dáiddárorganisašuvnnaide ja dáiddárráđđái, lasáhussan sámi dáiddárstipendii, ja gieskat ásahuvvon sámi girjjálašvuođa, musihka ja luđiid sisaoastinortnegii.
- Sámediggeráđđi oaivvilda ahte sámi girjjálašvuođa, musihka ja luđiid sisaoastinortnegis lea positiivvalaš váikkuhus sihke sámi giela ja kultuvrra oidnosii buktimii. Sisaoastinortnet lea oaivvilduvvon sihkkarastit dan ahte sáhttá juohkit álbmogii kvalitehta dáfus buoremus vejolaš almmuhemiid sámegillii, cealká ráđđelahttu Vibeke Larsen.
Sisaoastinortnegii lea várrejuvvon 300 000,- ru šiehtadusas mii galgá meannuduvvot dievasčoahkkimis 48. vahkus.
Bealit leat soahpan ahte loahppa 100 000,-, ru mii lea evttohuvvon lasáhussan juolludussii, juogaduvvo luohtta doaibmadoarjaga ja dáiddárstipeandda gaskka.
Doaibmadoarjaga ekonomalaš rámman lea evttohuvvon 1 970 000,- ru ja sámi dáiddárstipeanda bajiduvvo 2 250 000,- ruvdnui.