Filmmat "Samefolket 30 år etter" ja "The Nomads trail" ožžot doarjaga sámediggeráđis.
The Nomads trail
Nubbi filbma, mánáid- ja nuoraidfilbma The Nomads trail, lea 11 jahkásaš Kárášjoga nieidda birra ja Israela bártni birra. Goappašagat leat álgoálbmogat, geain leat hástalusat go galgaba searvat dan stuorra oppamáilmmálaš searvevuhtii, mas jagiáiggit, dálkkádat ja kultuvra stivre sudno eallima. Kautokeino Film AS dat háliida ráhkadit filmma ovttas Mediamente AS:in.
Samefolket 30 år etter
Nubbi filbma,"Samefolket 30 år etter", lea fas dokumentára sápmelaččaid ja sámi dilálašvuođaid birra 30 jagi áigodagas. Siivet AS Leavnnjas lea ohcama duogábealde.
- Midjiide lea deaŧalaš ahte sámi filbmaráhkadeapmi beassá ovdánit. Sámediggeráđđái lea deaŧalaš ahte ráhkaduvvojit eanet sámi mánáid- ja nuoraidfilmmat ja dokumentárat. Dát guorrasa muđui min álginjulggaštussii, mas mii dadjat ahte mii áigut leat mielde nannemin sámi mánáid filbmafálaldaga ja áŋgiruššat eanet dokumentáraiguin. Sámi filbmaráhkadeapmi lea ávkkálaš sámi servodahkii ja servodahkii muđui ge. Danne lea sámediggeráđđi juolludan stuorra supmi dáid prošeavttaide, dadjá sámediggeráđđi Laila Susanne Vars.
- Sámediggeráđđi sávvá lihku goappašiid filbmaráhkademiide, ja mii vuorddašit iluin beassat oaidnit dáid ođđa filmmaid, dadjá Vars.