Reivves Máhttoministarii Kristin Halvorsenii bivddii várrepresideanta ahte ovddasteaddji maid Sámediggeráđđi evttohii nammaduvvo ollesárvosaš lahttun vánhenlávdegoddái. Sámediggeráđđi ákkastalai dainna ahte vánhenlávdegoddi lea erenoamáš deaŧalaš orgána mii galgá buktit rávvagiid njuolga Ráđđehussii mánáidgárdepolitihkalaš áššiin. Ráđđi čujuhii ahte lea dárbu oažžut bissovaš sámi ovddasteaddji mii sáhttá ovddidit áššiid mat leat deaŧalaččat sámi vánhemiidda ja mánáide.
Departemeanta lei álggos hilgon Sámediggeráđi evttohusa sámi vánhenovddasteaddji ektui lávdegottis, ja lei evttohan ahte sámi vánhenovddasteaddji galggai leat dušše konsultatiiva lahttu ja gohččojuvvot čoahkkimii aivve dalle jos Vánhenlávdegoddi guorahallá dakkár áššiid mat leat deaŧalaččat sámi álbmogii ja sámi mánáidgárdesuorgái.
Lávdegotti mandáhta lea viiddis ja politihkalaččat hui deaŧalaš Sámediggeráđđái ja evttohusat maid lávdegoddi buktá gusket hui ollu maiddái sámi mánáide.
- Danne leat mii Sámediggeráđis hui ilus go Máhttodepartemeanta rievdadii oainnus ja nammadii Skarviikka ollesárvosaš lahttun lávdegoddái boahtte njealji jahkái, dadjá várrepresideanta Laila Susanne Vars.
Deaŧalaš resursa
Várrepresideanta Laila Susanne Vars oaivvilda ahte Sámedikki evttohas, Roger Skarvik, lea deaŧalaš resursa.
- Roger Skarvik lea bargan árjjalaččat lagasbirrasisttis áššiiguin mat gusket sámi mánáide ja nuoraide, ja danne lea son hui deaŧalaš resursa lávdegoddái. Sámediggeráđđái lei erenoamáš deaŧalaš oažžut sámi ovddasteaddji lávdelávdegoddái vai sámi vánhenjietna gullošii nationála dásis dalle go Ráđđehus lea hábmemin mánáidgárdepolitihkas.
Skarvik lei maŋŋebárgga golggotmánu 12. b. vuosttaš gearddi mánáidgárdevánhenlávdegotti čoahkkimis.
Roger Skarvik, Ráđđehusa mánáidgárdevánhenlávdegotti sámi vánhenovddasteaddji: telefovdna: 976 26 617.