Rabasvuohta ja máhtolašvuohta gessojuvvojedje ovdan deaŧalaš beallin iešsoardimiid eastadeami oktavuođas.
- Mii politihkkarat fertet duostat hállat váttis áššiid birra. Movt mii muđui sáhtášeimmet evttohit doaibmabijuid main livččii ávki álbmogii? Juohke iešsoardin lea álo okta menddo ollu, ja dan olis boahtá moraš, celkkii presideanta Egil Olli čoahkkinoasseváldiide.
Sámedikki presideanta Egil Olli dovddahii dasto ahte Sámediggi áigu viidáseappot bargat amas fáddá iešsoardin vajálduvvat dan oktavuođas go bajimuš rámmat dearvvašvuođa doaimmahahkii galget hábmejuvvot.
- Mii oaidnit ahte dárbbašuvvo oppalaš kulturgelbbolašvuohta sámi geavaheddjiid birra buot dásiin, oahppovuogádaga rájes veahkkeásahusaid rádjai. Mii oaidnit maiddái ahte lea dárbu ollu buorebut oktiiordnet daid veahkkefálaldagaid mat juo gávdnojit. Eastadeapmi ja oktiiordnen leat deaŧalaš mihttomearit Ovttasdoaibmanođastusas ja nationála dearvvašvuođapolitihkas. Min bargun šaddá sámi perspektiivva oččodeapmi dasa.
Egil Olli sáhkavuoru SÁNAG-konferánssas 2010 sáhttá lohkat liŋkkas vuolábealde.