Sámediggeráđđi háliida bidjat guovddážii daid stuorra hástalusaid mat boazodoalus leat dain guovlluin gos leat ollu boraspiret.
-Mii bidjat merkii ahte boazodoallu ja eanadoallu rahčet dainna go masset nu ollu bohccuid boraspiriide. Muhtun guovlluin masset nu ollu bohccuid ahte dan sáhttá lohkat roassun sidjiide geain leat eallit guohtumin dákkár guovlluin, dadjá várrepresideanta Marianne Balto.
Ulbmilin lea gávdnat čovdosiid
Seminára ulbmilin lea gávdnat dakkár čovdosiid mat vuođđuduvvojit máhtolašvuhtii ja vásihusaide boazodoalu, hálddašeami ja dutkama beales. Seminára olahusjoavkun leat njeallje davimus regionála boraspirelávdegotti, ja dasto eará guoskevaš hálddašan- ja ealáhusaktevrrat ja politihkkarat.
-Seminára sáhkavuoruin lea viidodat ja vásihusat boraspiriid ektui sierra oktavuođain ja dat sáhttet leat mielde addimin buriid rávvagiid boraspiriid hálddašeddjiide ja mat sáhttet leat ávkkálaččat buohkaide, dadjá Sámedikki várrepresideanta Marianne Balto.
Seminára dollojuvvo Radisson Blu hoteallas Stjørdalas gaskavahku skábmamánu 10. b. rájes dii. 12.00 ja loahpahuvvo lunššain duorastaga skábmamánu 11.b. dii. 13.00.
Seminára lea rabas boazodolliide ja eará berošteddjiide.
Váldde oktavuođa Sámedikkiin jos dus ležžet gažaldagat:
Ráđđeaddi Nanni Mari Westerfjeld tel 74 13 80 61 dahje nanni.mari.westerfjeld@samediggi.no dahje ráđđeaddi Brita Oskal Eira tel 78 47 41 85 dahje brita.oskal.eira@samediggi.no