Duogáš Sámediggeráđi konsultašuvnnaide lea ahte sámi mánáin dávjá lea oktavuohta dakkár mánáidsuodjalusain, mas váilu giella- ja kulturgelbbolašvuohta.
- Sámi mánáid vuoigatvuođat álgoálbmotmánnán bohtet ovdan riikkaidgaskasaš konvenšuvnnain ja nationála lágain. Dát vuoigatvuođat dadjet čielgasit ahte sámi mánáin lea vuoigatvuohta oažžut dakkár fálaldaga mánáidsuodjalusa fuolahusas, mas lea sámi giella- ja kulturáddejupmi, dadjá ráđđelahttu Ellinor Marita Jåma.
Sámediggeráđđi Ellinor Marita Jåma čujuha loahpas dasa ahte deaŧaleamos lea, Sámediggeráđi oainnu mielde, ahte mánáidsuodjalusa bearráigeahččaneiseválddit leat geatnegasat čuovvolit sámi mánáid vuoigatvuođaid fuolaheami barggusteaset.
Evttohuvvon rievdadusat gustojit erenoamážit 18.12.2003 mannosaš láhkaásahussii nr. 1659 sadjásašruovttuid birra ja 11.12.2003 mannosaš láhkaásahussii nr. 1564 mánáid bearráigeahču birra mánáidsuodjalusásahusain fuolahusa ja divššu várás.
Evttohuvvon láhkaásahusrievdadusat leat dál biddjojuvvon gulaskuddamii vástidanáigemeriin 11.1.2011.
Áššelogahallan lea dás.