Váikkuhangaskaomiid mihttomearri lea leamaš ovddidit dáidda- ja kultureallima máŋggabealatvuođa, ja sihkkarastit sámi váikkuhanfámu sámi kulturovddideamis.
Árvvoštallan čájeha ahte ruđat leat geavahuvvon ollu doaibmabijuide mat leat vuolggahan stuorra áŋgiruššama sámi kultureallimis.
-Eanaš prošeavttat masa ohccojuvvo ruhta, eai livčče čađahuvvon Sámedikki váikkuhangaskaomiid haga. Dat čájeha ahte Sámedikki váikkuhangaskaoamit kulturovddideapmái leat deaŧalaččat sámi kultuvrra ovddideapmái, dadjá sámediggeráđđi Vibeke Larsen.
Árvvoštallan čájeha maiddái ahte Sámedikkis lea buoridanmunni bagadallama, prošeavttaid lagat čuovvoleami ja buoret dárkkisteami máksimiid oktavuođas.
Norut Alta čujuha dasa ahte Sámedikki kulturovddideami váikkuhangaskaomiin guhkit áiggi vuollái lea barggolašvuođabeaktu, muhto ii leat leamaš vejolaš mihtidit dákkár beavttuid dán árvvoštallamis.
Lokten dihtomielalašvuođa
Váikkuhangaskaoamit kulturovddideapmái lea lokten dihtomielalašvuođa sámi kultuvrra fuolaheapmái, ovddideapmái ja gaskkusteapmái. Sámedikki váikkuhangaskaoamit leat addán sámi kultuvrra oassálastiide dohkkeheami ja movtta joatkit prošeavttaideaset.
Sámediggeráđđi áigu Sámedikki dievasčoahkkimii ovddidit ságaškuššama mas dievasčoahkkin bovdejuvvo digaštallat hástalusaid dan oktavuođas ahte addit sámi servodahkii buriid vejolašvuođaid ovddidit sámi kultuvrra máŋggabealatvuođa.
-Buot sámi kulturbargit áŋgiruššet nannosit dainna ahte láhčit vejolašvuođaid sámi kulturdoaimmaide miehtá riikka. Dát áŋgiruššan lea dagahan ahte sámi kultuvra dohkkehuvvo ja áddejuvvo buorebut, ja danne lea deaŧalaš maiddái boahtteáiggis fuolahit dán barggu buriin vugiin, loahpaha sámediggeráđđi Vibeke Larsen.