Giellabálkkašupmi geigejuvvo juohke nuppi jagi ja 12 500 euro sturrosaš bálkkašumi juogadeaba Máret Sárá ja Lajla Mattsson Magga.
Davvi- ja máttasámegiella guovddážis
Dán jagi lea davvi- ja máttasámegiella guovddážis. Goappašiid gielaid hállet Norgga ja Ruoŧa bealde Sámis.
Árvvoštallanlávdegoddi čilge manne Máret Sárá guovttos Lajla Mattsson Maggain oažžuba jagi 2010 Gollagiela bálkkašumi:
Máret Sárá:
Máret Sárá riegádii 1947 ja bajásšattai Bissojogas Porsáŋggus, Norgga bealde. Son lea válljen geavahit iežas eallima ávkin davvisámegiela ovddideapmái. Son lea bargan oahpaheaddjin, čállin, journalistan, Boazodoallohálddahusa ráđđeaddin ja lágádushoavdan ja sus leat leamaš njunuš doaimmat ollu servviin ja politihkalaš bargguin. Bargu sámegielain lea leamaš su fidnogeainnu mearusárpun ja son lea leamaš buorre ovdagovvan sihke fidnodoaimmain ja nissonolmmožin.
Ođđa oahpahanvuogit
Oktanaga dainna ahte son lea oahpahan ohppiid ja studeanttaid, lea son leamaš mielde rievdadeamen sihke oahpahanvugiid ja ieš oahppovuogádaga. Son lea almmuhan oahppogirjeráiddu Eatnigiella ovttas Kirsten Pope:in, ja girjjiid sátne- , jietna- ja oahppanstohkosiiguin. Maŋimus jagiid lea son maiddái almmuhan moadde sámi sátnevájasgirjji. Buohkanassii lea son almmuhan dahje leamaš mielde almmuheamen badjel 40 girjji.
Ovddasmanni
Máret Sárá lea dakkár olmmoš gii duostá leat ovddasmannin. Son lea olles eallináiggistis áŋgiruššan sihke virgáiguoskevaččat pedagogan, journalistan ja čállin, muhto maiddái giellapolitihkalaččat. Árvvoštallanlávdegotti mielas dagaha Máret Sárá viiddes áŋgiruššan sámegielain ahte son lea gelbbolaš Gollegiela bálkkašumi vuoiti.
Lajla Mattsson Magga:
Lajla Mattsson Magga riegádii 1942 Kall nammasaš báikkis Jämtlandas, Ruoŧa bealde, ja son lea dasto ássan máŋga jagi Guovdageainnus, Norgga bealde. Universitehtaáiggi rájes lea máttasámegiela gáhtten, oahpaheapmi ja ovddideapmi leamaš guovddážis su fidnodoaimmain ja priváhta eallimis. Su doaibmasuorgi lea viiddis ja dasa gullet sihke čáppagirjjálašvuohta ja fágagirjjálašvuohta, jorgaleamit, oahpahus, giellaávdnasiid ja báikenamaid čoaggin ja erenoamážit bargu máttasámegiela sátnegirjjiiguin.
Pedagoga ja čálli
Lajla Mattson Magga lea guhkes áiggi bargan oahpaheaddjin ja sensorin máttasámegielas. 1984 almmuhuvvui su vuosttaš girji Maahke ryöknie, man čuvvo eará oahppogirjjit ja mánáidgirjjit. Dál lea son mielde jorgaleamen ođđasit biibala máttasámegillii seammás go son bargá máttasámegiela grammatihkkagirjjiin. Su stuorámus olahus giellasuorggis lea bargu guvttiin sátnegirjjiin Åarjelsaemien-daaroen baakoegärjä/Máttasámegiel-dárogiel sátnegirji (ovttas Knut Bergsland:in) ja Dárogiel-máttasámegiel sátnegirji/ Daaroen-åarjelsamien baakogærja.
Giellaoaivadeaddji
Lajla Mattson Magga lea olles eallináiggistis áŋgiruššan garrasit máttasámegielain, mii dagaha su deaŧalaš giellaoaivadeaddjin ja gelbbolaš Gollegiela bálkkašumi vuoitin, čállá árvvoštallanlávdegoddi ákkasteamistis.