Báikkálaš máhttu ja árbediehtu fuolahuvvon
Rámmašiehtadus galgá sihkkarastit duohta konsultašuvdnaproseassa mas báikkálaš vásáhusat ja árbediehtu doibmet ovttas dieđalaš árvvoštallamiiguin ja vugiiguin.
- Rámmašiehtadus mii odne vuolláičállojuvvui, mearkkaša earret eará ahte ásahuvvo bargolávdegoddi mii galgá veahkehit konsultašuvdnaproseassa luossabivddu muddema oktavuođas mearas ja jogain Davvi-Romssas ja Finnmárkkus. Bargolávdegottis leat mearraluossaservviid, johkabivdoeaiggádiid, Finnmárkkuopmodaga, Romssa ja Finnmárkku fylkkamánniid, Luondduhálddašandirektoráhta ja Sámedikki ovddasteaddjit, čilge várrepresideanta Marianne Balto.
Son čilge viidáseappot ahte lassin bajábealde namuhuvvon olbmuid, nammaduvvo áššedovdi lahttu luossahálddašeami dieđalaš ráđi bealis ja áššidovdi árbedieđu bealis. Várrepresideanta Marianne Balto deattuha maiddái ahte Sámediggeráđđái lei deaŧalaš ahte stuorát deaddu biddjojuvvui báikkálaš vásáhusaide ja árbedihtui muddenbarggus.
Go dál lea ásahuvvon bargolávdegoddi, de maiddái fuolahuvvo ahte muddemat mearas ja jogain árvvoštallojuvvojit ollislaččat ja oktasaččat boahtteáiggis. Dat mearkkaša ahte sihke meara ja jogaid hálddašeapmi ja vuoigatvuođaeaiggádat galget juksat oktasaš áddejumi ja čuovvut oktasaš rávvagiid boahtteáiggi muddemiid oktavuođas.
2010 bivdináiggit gustojit maiddái 2011 lohppii
Dat bargu mii dál galgá álggahuvvot, dárbbaša doarvái áiggi vai olahuvvojit buorit muddemat. Vai bargolávdegotti bargu šaddá duohta ja dohkálaš, de galgá lávdegoddi evttohit muddemiid 2012 várás. Dat mearkkaša ahte mearraluossabivdomuddemat 2010 várás ain galget gustot 2011 várás. Dat muddemat mat gustogohtet 2012 rájes, galget gustot 4 jagi ovddasguvlui.
Olles rámmašiehtadusa sáhtát lohkat dás.