Vuosttaš čoahkkimis oasálaččaid gaskka jagi 2011 ođđajagimánus konsulterejuvvo dan birra movt dát bargu konkrehta galgá čađahuvvot.
Sámedikki presideanta Egil Olli deattasta ahte vuosttaš vuorus lea deaŧaleamos dat ahte bealit soabašedje dakkár konsultašuvdnaproseassa mii lea árjjalaš ja čovdosiid ohcaleaddji, man ulbmilin lea olahit ovttamielalašvuođa.
Duogáš
Sámi vuoigatvuođalávdegoddi buvttii vuosttaš čielggadusas NÁČ 2007: 13 "Ođđa sámeriekti" ja NÁČ 2007: 14 "Sámi resursageavaheapmi ja riektedilli Hedmárkku rájes Romsii" juovlamánu 3. b. 2007.
NÁČ 2007: 13 "Ođđa sámeriekti" lea dál leamaš gulaskuddamis ja konsultašuvnnat Sámedikkiin lea deaŧalaš oassi ráđđehusa viidáset barggus.
-Lea gollan guhkes áigi dan rájes go Sámi vuoigatvuođalávdegoddi buvttii čielggadusaidis 2007:s ja mun lean movtta go mii viimmat beassat álggahit konsultašuvnnaid. Ulbmilin lea oažžut dakkár láhkamearrádusaid main prinsihpalaččat ja geavahusas dohkkehuvvojit sámiid vuoigatvuođat, sihke oamastit ja geavahit árbevirolaš sámi guovlluid olggobealde Finnmárkku, ja dasto searvat hálddašeapmái, dadjá Sámedikki presideanta Egil Olli loahpas.