Boazodoallu Finnmárkkus rahčá. Maŋimus jagiid leat ealut sturron muhtun orohagain Finnmárkkus, mii lea guorbudan čakča- ja dálveguohtumiid sakka ja mielddisbuktán masttademiid.
Ja njuovahagat dieđihit ahte lea uhccán vejolašvuohta oastit bohccuid ja boazoeaiggádat eai beasa vuovdit njuovvanbohccuid. Ii ge dat veahket boazologu dillái, mii máŋgga guovllus lea menddo allat guohtumiid ektui.
- Mu mielas mii fertet leat várrogasat dainna ahte sivahit ovttaskas boazodoalli. Heajos ovdáneapmái leat máŋga siva, ja mii fertet buohkat váldit ovddasvástádusa das ahte čoavdit heahtedili, dadjá ráđđelahttu Ellinor Marita Jåma.
- Ollu boazoeaiggádat leat váldán ovddasvástádusa dakko bokte ahte sii leat ráhkadan geavahanplánaid ja plánaid mo geahpedit boazologu, muhto eai sáhte ollašuhttit dáid plánaid go ii leat vejolaš njuovvat. Ealáhussii lea deaddu juohke guovllus ja sihke borramušbearráigeahčču ja elliidsuodjalanorganisašuvnnat váidet sin, ekonomiija áitojuvvo ja buot dát čuohcá dearvvašvuhtii. Dilli čuohcá olles ealáhussii, maiddái sidjiide geat leat doalahan dohkálaš boazologu ja alla buvttadeami, dadjá ráđđelahttu Ellinor Marita Jåma.
Dál galget ealut dálveguohtumiidda Finnmárkku siseatnamiidda. Dábálaš jagiin lea boazu buori vuoimmis maŋŋá geasi, muhto ollu guovlluin dat ii leat nu, heajos guohtuma geažil, ja ollu rátkkašemiid geažil.
- Mihttomearrin ferte leat ahte sáhttá vuovdit bohccobierggu ja jođáneamos lági mielde oažžut dássedeattu ekonomiija ja ekologalaš boazodoalu gaskkas. Njuovahagaide ferte láhččojuvvot vejolašvuohta njuovvat bohccuid. Guolástusas lihkostuvve galmmihanortnegiin go lei váttis vuovdit guoli. Seamma vuogi berre árvvoštallat bohccobiergosuorgái, evttoha Jåma. Dakkár ortnet sihkkarasttášii ahte boazodoallit sáhtášedje vuovdit bohccuid ja seammás oččošedje áiggi buoridit bohccobiergomárkana. Dán doaibmabiju sáhtášii čađahit hui fargga, dadjá Jåma.
Ráđđelahttu Ellinor Marita Jåma dadjá ahte lea deaŧalaš fuolahit elliidčálggu ja dasa fertejit boazodoallit ja eiseválddit gávdnat buriid čovdosiid amaset eallit biidnašuvvat dárbbašmeahttumit.
-Sámedikkis lea čoahkkin Eanandoallo- ja biebmodepartemeanttain juovlamánu 14. b. Oslos. Doppe áiggun čuovvolit dáid hástalusaid, loahpaha Jåma.