Sáhkavuorru ráđđelahtu Ellinor Marita Jåma bokte
Bures boahtin Divvun 2.0 almmuheapmái. Divvun 2.0 fállá lullisámegiela čállinveahki. Sávan dát reaidu šaddá buorre veahkkin ealáskahttimii ja lullisámegiela geavaheapmái ja ahte dát teknologiija bidjá vuođu ođđa ovdánahttinprošeavttaide buot sámegielain.
Divvunreaidu lea dán rádjái leamaš anus dušše davvi- ja julevsámegielas, muhto almmuhuvvo dál maiddái lullisámegiela veahkkin. Divvun lea divvunreaidu sámegielaide, ja reaidu sisttisdoallá riektačállima ja sátnejuohkima, mat leat dat vuođđoveahkkeneavvut čállimis.
Lullisámegiela Divvunreaidu lea áibbas ođđa veahkkeneavvu lullisámiide ja lea okta oassi stuorit doaimmas nannet lullisámegiela. Dievvunreaidu sáhttá bidjat vuođu ovddidit eanet veahkkeneavvuid. Davvisámegielas gávdno juo veahkki mii čilge teavsttaid, giellaoahppanprográmma ja elektrovnnalaš sátnegirjjit mat atnet sámegiela giellateknologiija, ja lea maid veahkkeneavvun jorgaleddjiide. Vuođđoresurssat Divvunreaidduin addet lullisámegillii seamma vejolašvuođaid.
Dál lea álggahuvvon prošeakta maid Sámediggi ja Romssa Universitehta ruhtadeaba mas jurdda lea ráhkadit giellaoahpporeaiddu mas vuođđun lea seamma giellateknologiija go dat mii lea adnon Divvun- reaidduin.
Divvuprošeavtta jođiheaddjit duođaštit ahte eará lassibuvtta prošeavttas lea álgosátnegirji mii atná giellateknologiija gieđahallat buot sojahanmálliid njuolga, nu ahte geavaheaddji sáhttá ohcat buot sátnehámiin, ja oažžut jorgaluvvot, analysa ja vuođđohámi.
Divvun- reaiddut leat nuvttá ja daid gávdná dihtoris www.divvun.no - čujuhusas, ja leat ovdánahttojuvvon nu gohčoduvvon Sámedikki Divvun- prošeavtta bokte. Vuosttaš Divvun- prošeakta ráhkadii reaiddu davvi- ja julevsámegillii mii lei válmmas 2007;as. Divvun 2- prošeakta jotkkii dán barggu, ja ráhkadii giellareaiddu maiddái lullisámegillii.
Snåasen tjielte/Snåsa suohkan lea sámegiela giellahálddašanguovllu suohkan. Leat ollu positiivvalaš dáhpáhusat dáppe dál giellaovdáneami ektui, ja mus lea dan dihte buorre jáhkku dasa ahte lullisámegiella dađistaga álgá gullot ja oidnet eanet ja ovdána ealli giellan. Lean agalaš optimista, nu ahte jáhkán nu dáhpáhuvvá. Dehálaččamus lea ahte láhččojuvvo dilli buori ohppui vuođđo- ja joatkkaskuvllain, vai eambbogat movttidahttojuvvojit oahppat sámegiela.
Giellagelbbolašvuohta lea gealbu maid bargoeallin ohcala eanet ja eanet ja lea dasa lassin riggodahkan ieš alddis, muhto maiddái dehálaš iešdovddu guoddi. Dan dihte lea sámegiella dehálaš. Sámegiela čájehemiin boahtá lullisámi kultuvra maid buorebut oidnosii stuora servodahkii.
Vai ollesolbmuide šattašii stuorit vejolašvuohta háhkat oahpu sámegielas, de sávašin ahte ceggejuvvošii giellaguovddáš mii attášii rávisolbmooahpu sámegielas nuoraid- ja váhnenbulvii geat dađibahábut lea massán eatnigielaset. Lea seamma dehálaš láhččit dili ollesolbmuide go mánáide mánáidgárddiin vai oččoše vejolašvuođa oahppat giela. Jus galgat oažžut ealli giela, de fertejit ollesolbmot ja váhnemat gulahallat mánáideasetguin. Ulbmil fertet leat ahte olbmot leat doaibmi guovttegielagat.
Dan dihte sávan ahte dát reaidu livčče stuora veahkkin ja attášii liige movttidahttima buohkaide geat beroštit oahppat giela, muhto maiddái vai dát šattašii buorren reaidun sidjiide geat beaivválaččat barget lullisámegiela ovddidemiin. De vuorddán ahte lullisámegiela Divvunprográmma biddjošii buot dihtoriidda ja viššalit adnojuvvošii.