Sámediggi lea šiehttan VINN:ain čuovvolit sin geat leat álggahan lotnolasdoaimmaid máttasámi guovllus maŋimus viđa jagis. Dát dáhpáhuvvá ovttas Nordlándda fylkkasuohkaniin.
Prošeavtta mihttomearri lea oahpahit oassálastiid mo sii sáhttet buoridit aiddo álggahuvvon doaimmaid gánnáhahttivuođa.
Go doaibma álggahuvvo, de sáhttet mannat máŋga jagi ovdalgo fitnodagas lea badjebáza. Dakkár doaimmat ožžot menddo uhccán beroštumi sin bealis geat leat ruhtadan prošeavtta.
Olahusjoavkun leat sámi lotnolasealáhusdoallit máttasámis. Dán vuoru leat ferten rádjet kurssa Mátta-Nordlándii ja Davvi-Trøndeláhkii.
Nannet ássama
-Sámediggi lea vuoruhan ruhtadit ođđa doaimmaid, muhto dattetge lea leamaš deaŧalaš bisuhit ja ovddidit dálá doaimmaid ja nu sihkkarastit barggolašvuođa sámi guovlluin, dadjá doaibmi várrepresideanta Marianne Balto.
Sámediggái lea deaŧalaš čuovvolit ođđa álggaheddjiid vai sihkkarastojuvvo ahte álggaheaddjit válljejit rivttes vugiid álggahanmuttus.
Čuovvoleapmi galgá dáhpáhuvvat čoagganemiid bokte. Galget leat golbma čoagganeami, juohke čoagganeapmi bistá guokte beaivvi.
Fáddán leat gánnáhahttivuođa árvvoštallan, rehketdoallosuokkardeapmi, vuovdin- ja márkandilit, fierpmádatduddjon ja fitnodatovddideapmi.
Vuosttaš čoagganeapmi guovvamánus
Mii eat leat vel mearridan gos čoagganeamit galget leat - fertet oaidnit gos oasseváldit bohtet.
-Jus prošeakta lihkostuvvá, de áigu Sámediggi árvvoštallat čađahit sullasaš prošeavttaid eará sámi guovlluin ge, dadjá Balto.
Čuovvolanbargu galgá leat loahpahuvvon geassemánus.
Dieđiheapmi
-VINN:as lea guhkes vásáhusat sullasaš bargguin, ja mii doaivut ahte ollu álggaheaddji dieđihit čuovvolanbargui, dadjá Balto.
Dat geat háliidit searvat sáhttet váldit oktavuođa Harald Granrudain, telefuvdna 908 33 126 dahje e-posta bokte: harald.granrud@vinn.no