Heargevuoddji Anne Risten Sara eret Guovdageainnus ja gárggalmastin valáštalli Henning Holti eret Moelven nammasaš báikkis oažžuba Sámedikki 2010 nuoraid valáštallanstipeandda.
Stipeanda mii lea 50 000 ru galgá movttiidahttit nuorra valáštalliid áŋgiruššat valáštallamiin.
Njunnošis iežas suorggis
22-jahkásaš Anne Risten Sara lea vuodján herggiiguin dan rájes go lei 7 jagi boaris, ja vaikko dát lea ollásit albmáid valáštallan, de lea son birgen bures dán valáštallamis.
Juo 7 jahkásažžan vuittii son heargevuodjimis ja lea vuoitán ollu gilvvuid. Son lea vuoitán NM, MM ja Gollediibmogilvvuid Suomas.
2010:s dovddastuvvui son máilmmi buoremus heargevuoddjin. Dát mearkkaša dan ahte mediat leat su čuvvon, maiddái olgoriikkas.
17 norgga meašttirvuođa
21-jahkásaš Henning Holti eret Moelven nammasaš báikkis lea leamaš njunnošis iežas valáštallamis máŋga jagi. Holti lea dán rádjai vuoitán 17 norgga meašttirgilvvuid luođuvaláštallamis. Holtis livččii áigumuššan váldit medáljja juniora EM luođuvaláštallamis 2011:s.
36 ohcama
Sámediggái bohte oktiibuot 36 ohcama.
- Dát ohcamat leat movttiidahttán min sakka Sámedikki barggu ektui sámi valáštallamiin, ja ii lean eisege álki válljet dušše guoktása. Mii geavahit vejolašvuođa sávvat buot ohcciide lihku valáštallamiin, dadjá Larsen.