- Dát vuolláičállin duođašta ahte Sámedikki minerálaveahkki sihke árvvus adnojuvvo ja čuvvojuvvo servviid bealis mat háliidit ásahit Sámis, cealká Sámedikki presideanta Egil Olli.
Sámediggi mearridii geassemánus sierra minerálaveahki das movt Sámediggi ja minerálasearvvit sáhttet soahpat gaskaneaset mineráladoaimmas sámi guovlluin. Dán minerálaveahkis daddjojuvvo ahte Sámedikki ja servviid gaskka dahkkojuvvojit šiehtadusat iskkadanbargguin ja plánain doaibmakonsešuvdnaohcama ektui. Šiehtadusain mat dál leat vuolláičállojuvvon leat maiddái boazodoalloorohagat D-34 ja D-30A oasálažžan, mii Sámedikki presideantta Egil Olli oaivila mielde nanne ovttasbarggu.
Šiehtadusas duohta iskkadanbargguin gozihuvvo beliid ovttasbargoovddasvástádus iskkadanbargguid plánema ja čađaheami oktavuođas. Boazodoalus lea geavahanriekti guovllus dološ áiggiid rájes geavaheami bokte ja dat suodjaluvvojit dábálaš bággolonistanrievttálaččat (vrd. Boazodoallolága § 4). Intenšuvdnašiehtadus lea oaivvilduvvon čilget movt proseassa beliid gaskka galgá dahkkojuvvot ja makkár fáttáid birra galgá šiehtadallat vejolaš konsešuvdnaohcamis ruvkedoaimma ektui.
- Illudahttá hui sakka, ja lea stuorra lávki rivttes guvlui, go maiddái boazodoallu lea mielde dán šiehtadusas. Go boazodoalloorohagat leat mielde de šaddet dat maid ovttaárvosaš beallin, maiguin Arctic Gold lea geatnegas gulahallat sihke dalle go iskkadanbarggut čađahuvvojit ja šiehtadallamiin vejolaš ruvkedoaimma ektui, cealká Sámedikki presideanta Egil Olli.
Boazodoallu lea duhtavaš
Iskkadanbargošiehtadusa mielde lea Arctic Golds iskkademiid ulbmilin čájehit ahte leat doarvái gávdnosat ruvkedoaimma álggaheapmái ovttasráđiid dáláš ja árbevirolaš ealáhusaiguin ja ávkkástallanvugiiguin, ja main livččii ávki báikkálaš servodahkii ja sámi kultuvrii ja ovdánahtášii daid.
- Vaikko boazodoalloorohagain váldoáššis ii leat beroštupmi ahte buot areálagáibideaddji aktevrrat galggašedje ásahit guovlluide gos sáhttet massit ollu guohtoneatnamii, de leat šiehtadusat maid mii dál leat dahkan buorit midjiide. Šiehtadus sihkkarastá ahte mii sáhttit bidjat eavttuid ja leat ovddabealde mielde mearrádusproseassain dadjá orohatjođiheaddji Johan Aslak Logje orohagas 30A Oarjjabealli ja orohatjođiheaddji Nils Isak Sara orohagas 34 Ábborášša.
Maiddái Arctic Gold dadjá ahte lea duhtavaš šiehtadusain mii lea vuolláičállojuvvon.
- Mun lean hui ilus go mii, ollu ságastallamiid maŋŋá, leat sihkkarastán movt mii galgat šiehtadallat ja ovttasráđiid bargat sámi álbmogiin Bidjovággeprošeavtta ovddideamis, dainna ulbmilin ahte doaibma šattašii gánnáhahttin, cealká Arctic Golds hálddahusdirektevra, Lars-Åke Claesson.