Sámediggi rahpá ođđa sátnevuorká interneahtas geassemánu 22. b. www.risten.no lea máŋggagielat ohcanbálvalus mas leat sihke dábálaš sánit ja doahpagat oarjel-, julev- ja davvisámegillii ja latiinna- ja dárogillii. Ođđa sátnevuorká rahppojuvvo virggálaččat gaskavahku geassemánu 22. b. dii. 12.00 Árran julevsáme guovdátjis, Ájluovtas.
- Ohcanbálvalus lea vearditmeahttun veahkkeneavvu giellaberošteaddjiide, áššedovdiide ja maidái dábálaš neahttageavaheaddjiidege. Mii jáhkkit ahte dakkár sátnevuorká, maid buohkat sáhttet geavahit, nanne sámegiela fuopmášahtti. Jáhkán dat maid movttiidahttá eanet sámegiela geavaheami, cealká ráđđelahttu Johan Mikkel Sara.
Dál leat su. 12 200 sáni vuorkkás. Sátni logahallojuvvo oktan váldosátnin ja jorgaluvvo máŋgga gillii. Dálá vuorkkás leat eanaš sánit davvisámegillii ja dárogillii. Sivvan lea go dat leat vižžojuvvon ovddeš vuorkkáin. Sámediggi joatká dál sátnelogahallama ja geavaha návccaid bidjat sisa eanet oarjel- ja julevsámegiel sániid. Vuogádaga lea Sámediggi ovddidan ja dasa lea vejolašvuohta maŋŋá bidjat eanet gielaid.
- Logahallanbargu lea áddjái, muhto mihttomearri lea ahte buot sánit mat gávdnojit sátnelisttuin ja sátnegirjjiin, galget dađistaga logahallojuvvot sátnevuorkái. Nu leage min mihttomearri ahte www.risten.no galgá šaddat dat ohcangirjin sámegiel sániid ja sámegiela riektačállima oktavuođas, maid olbmot ovddimusat válljejit geavahit, dadjá Sara.