Orginal Film AS Romssas leat ráhkadeame nuoraiddrámá TV:i mas galget 10 episoda. Ráidu lea ožžon bargonamahusa "Sámi eanan".
Ráiddu olahusjoavku leat mánát gitta 12 jahkái. Ráiddus leat 10 episoda mat bistet 25 minuhta. Orginal Film AS áigu filbmet giđđat 2011. Ráidu galgá čájehuvvot NRK:s 2012:s.
Sámi eanan
Váldoolmmoš lea Anneli (12) gii lea rivgu, ja Issát (12) gii lea sápmelaš. Anneli bággejuvvo fárret Guovdageidnui, ja doppe deaivá Issáha gii šaddá buorre ustit. Anneli ja Issát fuomášeaba ahte Guovdageainnus dáhpáhuvvot vearredagut, ja gávnnaheaba ahte eaba sáhte luohttit rávisolbmuide, ja nu ferteba ieža čoavdit "ášši".
Guovdageainnus filbmat
Orginal Film AS čállá ohcamis ahte filbmenbarggu geažil šaddet Guovdageidnui stuora váikkuhusat. Sullii 28 miljon ruvdnosaš bušeahtas, báhcá sullii 10 miljon ruvdnosaš árvu Guovdageidnui gálvvuid ja bálvalusaid oastima bokte.
Lassin besset báikkálaš filbmabargit loktet iežaset gelbbolašvuođa buvttadeami bokte. Dat mearkkaša ahte earáide šaddá eambbo geasuheaddji filbmet Guovdageainnus ja muđui dán guovllus. Guovdageaidnu oažžu ollu beroštumi filbmema oktavuođas juo, preassagalledemiid ja mediadieđáhusaid bokte, čállá Orginal Film AS.
-Prošeakta "Sámi eanan" galggašii váikkuhit sámi nuoraid movttiidahttimii vuoruhit filmma median mainna besset gaskkustit ee. sámi kultuvrra ja identitehta boahtteáiggis, ja mii illudit oaidnit bohtosa dán nuoraidráiddus, loahpaha ráđđelahttu Vibeke Larsen.