PRD:PRD: Sámediggeráđđi juolluda 50.000 ruvnno teáhtervistái Guovdageainnus
Sámediggeráđđi juolluda 50.000 ruvnno ovdaprošektii plánaid oktavuođas hukset ođđa teáhtervistti Guovdageidnui. Ruđat juolluduvvojit dainna ulbmiliin ahte čielggadit fágalaš, ekonomalaš ja eará deaŧalaš beliid huksenplánaid oktavuođas.
Almmuhan
Pål Hivand.
Vuosttaš geardde almmuhan 09.09.2005
- Sámediggi vuoruha sihkkarastit Beaivváš Sámi Teáhterii ain positiivva ovdáneami. Dat lea maid deaŧalaš ulbmil ovttasbargošiehtadusas gaskal Sámedikki ja Finnmárkku fylkkagieldda. Danne lean ilus go dál sáhttá čielggadit ođđa teáhtervistti huksema, dadjá Sámediggi presideanta Sven-Roald Nystø.
Sámediggi lea áššis 50/04 Sámedikki 2005 bušeahtta, várren ruđaid ovttasbargošiehtadusaid čuovvoleapmái fylkkagielddaiguin. Ovttasbargošiehtadusas gaskal Sámedikki ja Finnmárkku fylkkagieldda daddjojuvvo 13. artihkkalis ahte áššeoasálaččat ”áigot viidáset ovdánahttit Beaivváš Sámi Teáhtera sámi našunálateáhterin”.
- Heivvolaš visti veahkeha dieđusge sihkkarastit ahte teáhter sáhttá ovdánit dáiddalaččat.