Dát lea 33 proseantta lassáneapmi 2001 sámediggeválgga rájes. Áigodagas 2001-2005 lei nissonolbmuid oassi dušše 18 proseantta dahje čiezas golbmalogiovcci áirasis. Ođđa Sámedikkis leat 22 nissonolbmo 43 áirasa gaskkas.
- Lean hui duhtavaš dainna besten- ja dihtomielalašvuođaloktenbargguin, maid čađaheimmet ovdal válgga. Go ná ollu nissonolbmot ožžo vuosttas dahje nuppi saji válgalisttain, de bohtosat šaddet mealgat buoret go dan maid leimmet vuordán. Nissonolbmuid oasi lassáneapmi 18 proseanttas 51 prosentii lea eanet go leimmet oppa govahallan! Dat go nissonolbmuid oassi speadjalastá sámi servodaga, nanosmahttá sámi demokratiija. Sámedikkis leat nappo dalle eanet nissonolbmot go buot eará Davviriikkaid parlameanttain, dadjá Sámedikki várrepresideanta, Ragnhild Lydia Nystad.
Sámediggi álggahii 2001 guhkesáiggi barggu oččodit eanet sápmelaččaid sámi jienastuslohkui 2005 sámediggeválgii. Dán barggu guovddáš ulbmilin lei ahte eanet nissonolbmot ja nuorat galge čálihit iežaset sámi jienastuslohkui, muhto maiddái ahte eanet nissonolbmot galge válljejuvvot Sámediggái.
- Oinniimet juo miessemánus dán jagi ahte sámi jienastuslogus lei nissonolbmuid oassi lassánan 46 prosentii. Maiddái jienastuslohku ollislaččat lea lassánan badjel 2 600 olbmuin nu ahte dál leat das 12 538 olbmo. Nu ahte leat eahpitkeahttá lihkostuvvan nissonolbmuid oasi lasihemiin sámi jienastuslogus ja go leat ožžon eanet nissonáirasiid Sámediggái, loahpaha Nystad.