Sámediggeráđđi lea odne nammadan fágalávdegotti mii galgá čielggadit válgaortnega sámediggeválggain. Fágalávdegottis leat professor Per Selle jođiheaddjin, dutki Torunn Pettersen, professor Bjørn Erik Rasch, dutki Eva Josefsen ja professor Nils Oskal.
- Maŋŋil viđaid sámediggeválggaid lea dál áigi oažžut vuđolaš, ollislaš ja sorjjasmeahttun fágalaš árvvoštallama Sámedikki válgaortnega birra, lohká várrepresideanta Ragnhild L. Nystad.
Čielggadeami ulbmil lea:
• sihkarastit jienasteddjiid vuoigatvuođaid leat jienastuslogus ja oassálastit sámediggeválggain
• nannet Sámedikki legitimitehta ja oassálastima sámediggeválggain
• lasihit Sámedikki representativiteahta sámi servodaga ektui
• oažžut njuolggadusaid maid lea álki ipmiridit ja maid sáhttá beaktilmasat hálddašit
- Mun lean ilus go leat ožžon nana fágalaš lávdegotti mas leat alla válga- ja válgaortnetgelbolašvuot seammas go dovdet olles sámi servodaga. Lávdegotti čielggadeapmi oktan gulaskuddanvástádusaiguin šaddá vuođđun go galgá evttohit rievdadit sámelága válganjuolggadusaid. Sávan ahte Stuorradiggi sáhttá meannudit láhkarievdadanevttohusa buori áiggis ovdal jagi 2009 válggaid, loahpaha Nystad.