Nystø lea ollu jagiid bargan nuppi máilmmisoađi rádjalovssaid rahčamušaid dohkkehemiin.
- Mun lean hui ilus go Ráđđehus stáhtabušeahttaárvlusastis dohkkeha rádjalovssaid barggu Divttasvuonas nuppi máilmmisoađi áigge. Ráđđehus dovddaha ahte Sámedikki evttohus rádjalovssaid dutkan- ja duođaštanguovddáža hárrái Divttasvutnii Árrana sámi guovddáža oktavuhtii, čuovvoluvvo. Dál lea Sámedikki ja Árrana duohken buktit evttohusa movt dan konkrehta čađahit, cealká Sámedikki presideanta Sven-Roald Nystø.
Rádjalovssat Divttasvuonas gádjo ollu olbmuid heakka go lovsejedje olbmuid Norggas Ruŧŧii nuppi máilmmi¬soađi áigge. Maŋit áiggis leat lovssaid ráhčamušat ja ovttaskas olbmot eahpiduvvon. Eanaš rádjalovssat ledje sámit. Máinnašumi báidná sakka dalášáiggi oaidnu sámiide álbmoga gaskkas, ja dáruiduhttinpolitihkka, mii fievrriduvvui sámiid guovdu. Dán politihka leat stáhtaeiseválddit ja Girku dál šállošan ja bivdán sámiin ándagassii.
- Duođaštanguovddáš lea čuoččaldahttin iešalddis, ja duođašta oppalohkái daid mávssolaš ráhčamušaid maid rádjalovssat barge, sihke ovttaskas olbmuid ja riikka ektui soađi áigge, dadjá Nystø.