Sámi konfereanssa mearrádus borgemánus 1992:
Sámi álbmotbeaivi. ”Sámi álbmotbeaivin válljejuvvui guovvamánu 6. beaivi (6.2). Guovvamánu 6. beaivve 1917 dollojuvvui Troanddimis vuosttaš. sámi riikka-čoahkkin ja dohko ledje čoahkkanan sihke davvi- ja lullisámit...”
Samernas nationaldag. ”Den 6. februari (6.2) valdes till nationaldag. Den 6. februari 1917 samlades samer till
Trondheim till första landsmöte både nord- och sydsamar....”
Muđui lea Sámi konfereansa mearrádusastis geavahan doahpaga ”sámi álbmotlávlla”, mii dárogillii jorgaluvvon lea ”samisk/samenes nasjonalsang”. Mearrádusa ruoŧagiel jorgalusas geavahuvvo doaba ”samernas nationalsång”. Dasto geavaha Sámiráđđi doahpagiid ”sámiid čearddalaš dovdomearkkat” (samenes etniske kjennemerker) ja ”sámi nášuvnnalaš dovdomearkkat” (samiske nasjonale symboler/kjennemerker).
Namahus sámi leavga jorgaluvvo dárogillii ”det samiske flagget”. Dát namahus lea buoret ja dárkileabbo go ”samenes flagg” ja ”sameflagget”, mii lea geavahuvvon gaskaboddosaš norgalaš njuolggadusain sámi leavgga geavaheames.
Našuvdna
Doaba našuvdna mearkkaša olmmošjoavkku, mat dovdet iežaset gullat oktii oktasaš historjjá ja kultuvrra geažil, dábáleamosit oktasaš giela bokte. Našuvdna lea okta álbmot. Riikkaidgaskasaš eamiálbmotbarggus lea doahpaga ”našuvdna” vuođđun biddjojuvvon dát definišuvdna.
Doaba ”našuvnnalaš” lea dávjá čadnojuvvon álbmotriikkaid rájiide ja sisriikka doibmii, muhto seammás dát lea maiddái dakkár doaba mii geavahuvvo govvidit álbmoga oktavuođa. Mii guoská dáid doahpagiid geavaheapmái, de bidjá Sámediggi Sámi konfereanssa mearrádusa vuođđun, ja rávve ahte geavahuvvojit doahpagat ”samenes nasjonaldag”, ”samenes nasjonalsymboler” ja ”samenes nasjonalsang”.