PRD: Sámediggeráđđi váldá vuhtii mearkkašumiid
Riikkarevišuvndna geigii dokumeanttas nr. 1 Stuorradikki meannudeapmái. Dokumeanttas boahtá ovdan ahte Riikkarevišuvnnas leat mearkkašahtti mearkkašumit Sámedikki bušeahta čađaheapmái ja ahte dat hálddašeamit mat lea vuođđun rehketdollui, eai leat dohkálaččat stáhta ekonomiijahálddašeami norpmaid ja standárddaid mielde. Riikkarevišuvnnas eai leat dattetge mearkkašumit ieš dan 2004 rehketdollui.
Almmuhan
Kuhmunen, John-Marcus.
Vuosttaš geardde almmuhan 22.11.2005
Sámedikki presideanta Aili Keskitalo deattuha cealkámušastis ahte Sámediggi guhká lea bargan bearráigeahččandagaldumiidis buoridemiin ja Sámedikki ekonomiijahálddašeami loktemiin buori ja alla standárdii.
- Mii dovddastat ahte mii eat leat joavdan doarvái guhkás dán suorggis. Buoridanbargu lea bistán guhká jo, ja jotkojuvvo buot návccaiguin. Dáinna áigumušain leat jo álggahan ovttasbarggu Stáhta ekonomiijastivrema guovddážiin das ahte ráhkadit ekonomiijagiehtagirjji mas doarjjahálddašeami dagaldumit, siskkáldasbearráigeahčču ja njuolggadusat galget guorahallojuvvot. Dát bargu galgá plána mielde loahpahuvvot 2006 giđa. Mii bargat maiddái ovttas departemeanttain buoridit Sámedikki juolludan doarjagiid ulbmiliid árvvoštallan- ja čuovvolandagaldumiid, dadjá Keskitalo.
Sámedikki presideanta deattuha ahte eai leat fuomášuvvon ođđa, duođalaš bealit Sámedikki ekonomiijahálddašeamis.
- Mun deattuhan ahte dás lea sáhka váilevašvuođain, mat čatnasit iežamet siskkáldas ekonomiijastivrema dagaldumiide ja vuogádagaide. Ekonomalaš vearredagut eai leat dáhpáhuvvan. Deaŧalaš lea maiddái registreret ahte departemeanta áššemeannudettiin rámidii dan ovddidanbarggu maid Sámediggi lea jo čađahan ekonomiijahálddašeamis, dadjá Aili Keskitalo.