Álgosiidduid birra
Dreamweaver ja Photoshop ledje gos vuosttas siiddut ráhkaduvvojedje. Sisdoallu lei hui stáhtalaš, sihke hámi ja sisdoalu dáfus, ja geavaheaddjis ii lean vuorrováikkuhusvejolašvuohta – siidduin lei dušše dat vejolašvuohta ahte sáddet e-poastta hálddahussii.
Oaivilin lei ahte siiddut galge leat muhtun lágan ohcangáldun dassážii go eanet dynámalaš ja fidnomáhtolaš almmuhančoavddus lea sajis. Dalle lei maiddái hui eahpečielggas maid Sámediggi galggai bargat neahtas. Dárbu lei čađahit vuđolaš siskkáldas proseassa ja mearridit makkár áigumušat ja strategiijat galge leat Sámedikki elektrovnnalaš mediaáŋgiruššamis.
Sisdoallu lei juogaduvvon fáttáid mielde ja válljejuvvon dan vuođul makkár jearaldagaid hálddahus lei ožžon olbmuin: veaháš Sámedikki, organiserema ja fágasurggiid birra, veaháš sámiid ja sámi kultuvrra birra oppalaččat.
Boahtte buolvva neahttasiiiddut
Seammás go vuosttas siiddut almmuhuvvojedje lei bargu ođđa ja eanet dynámalaš neahttasiidduin juo álggahuvvon. Geassit 2000 dahkkojuvvui šiehtadus gálvolágideaddjin ođđa neahttačovdosa ektui.
Ođđa neahttačoavddus 2001:s
Ođđa neahttačoavddus (olgguldas ja siskkáldas siiddut) almmuhuvvui giđđat 2001. Čovdosis lei earret eará vejolaš guovtti gillii bálddalagaid almmuhit ja lei válljenvejolašvuohta. Geahččaluvvui maiddái elektrovnnalaš poastajournála, muhto teknalaš váttisvuođaid geažil dat heaittihuvvui johtilit. Vuosttas neahttasiidduid ektui lei dan ođđa čovdosa vuođul buoret vejolašvuohta geavahit interneahta aktiivvalaččat Sámedikki siidduin.
Digitála revolušuvdna Sámedikkis
2004:s váldojuvvui atnui elektrovnnalaš arkiiva Sámedikkis. Buot poasta olggos- ja sisaguvlui lea digitála, ja buot áššemeannudeapmi dáhpáhuvvá almmá báhpáriid haga. Dát lei vuosttas lávki barggus Sámedikki 2001:s mearridan ulbmiliid juksamis ahte ásahuvvojit neahttavuođus elektrovnnalaš bálvalusat. Ođđa almmuhančoavddus 2005:s lea nubbi huksendássi, mas ovttaiduhttin min neahttasiidduid ja áššemeannudanvuogádaga gaskka lea vejolaš. Dán geažil lea stuorát vejolašvuohta digitaliseret buot Sámedikki bálvalusaid geavaheaddjiid várás.