Eanadoallu sámi guovlluin gártá eanemusat gillát buvttadandoarjaga unnidemiid geažil. Dát vuolgá das go buvttadandoarjja sámi guovlluin dahká duppal geardi eanet go doarjja riikka buoremus eanadoalloguovlluin.
- Sámi beroštumit eai leat leamaš oppanassiige fáddán WTO-šiehtadallamiin. Mii eaktudat ahte Sámediggi váldojuvvo mielde ságastallamiidda go WTO-šiehtadusa detaljjat galget mearriduvvot, nu mo boahtá ovdan konsulttašuvdnanjuolggadusain gaskal stáhtalaš eiseválddiid ja Sámedikki, deattuha ráđđelahttu Terje Tretnes.
Sámediggeráđi lahttu, Terje Tretnes, bivdá reivves eanadoalloministarii Terje Riis-Johansen ráđđehusa láhčit diliid sierra eamiálbmotavádaga ásaheami oktavuođas, mii sáhtašii sihkarastit sámi eanadoalu boahteáiggi.
Diekkár avádaga ásaheapmi sáhtašii buoridit rámmaeavttuid, ovddidit báikkálaš hálddašanmodeallaid ja nannet luondoresurssaid báikkálaš rievttiid. Resurssaid regiunálalaš hálddašeamis diekkár avádagas galgá leat vuođđun gaskariikkalaš álbmotvuoigatlaš prinsihpat mat leat cieggan eamiálbmotrievttiin.
- Eanadoallu lea oassin sámi kultuvrra materialalaš vuođus seamma go boazodoallu ge lea. Dát mielddisbuktá ahte Norga ferte addit sámi eanadollui ja boazodollui nana suodjaleami.