Sámediggepresideantta álbmotbeaivvi dearvvuođat

Mii leat okta álbmot mii ássá maŋgga riikkas, dainna kultuvrralaš riggodagain ja girjáivuođain maid dat sisttisdoallá. Dát oktavuohta lea oadjebasvuohta man ala galgat hukset boahtteáiggi. Dat mii min earuha lea maiddái sámi servodaga nanusvuohta. Dat čájeha ealli kultuvrra mii ovdána ja rievdá.

Leat leamaš stuora nuppástuvvamat vuosttaš sámi riikkačoahkkima rájes Troanddimis, guovvamánu 6. beaivvi 1917. Sámi álbmoga ovdáneapmi manná rievttes guvlui, vaikko ollu dain áššiin maid min máttut digaštalle dalle, ain leat áigeguovdilat – ja čoavddekeahttá.

Mun sávan ahte álbmotbeaivvi dovdat oktiigullevašvuođa ja ahte mii ávvudit solidaritehtain eará álbmogiidda. Mii leat buohkat ovttaárvosaččat olmmožin, ja dárbbašit nannet vuođđoárvvuid nu og gierdevašvuođa ja olmmošlašvuođa. Dan dihte mii atnit árvvus go maiddái earát go sápmelaččat leat mielde ávvudeame min álbmotbeaivvi.

Min mánát ja nuorat leat boahtteáiggi sámi kultuvrra seailluheaddjit. Min deháleamos bargun lea sihkkarastit sidjiide boahtteáiggi maid sii galget hálddašit ja ahte sii dovdet sámi gullevašvuohta. Dán mii fertet čalmmustahttit sihke politihkas ja árgabeaivvis, ja mii galgat duostat ražastit go min vuođđovuoi gatvuođat áitojuvvojit. Lea dehálaš maiddái nuoraide beassat váikkuhit iežaset eallineavttuid ovdáneapmái.

Dáiguin sániiguin hálidan sávvat sámi álbmogii lihku beaivái, ja sávvat lihku ávvudeapmái. Mun sávan didjiide fiinna álbmotbeaivvi, mas buohkat gávdnabehtet juoidá mainna illudehpet ja soaitá somás muitalus maid beassabehtet boagustit.

Aili Keskitalo
Sámediggepresideanta