Bálkkašumi ulbmil lea movttidahttit ain bargat dásseárvvu ja ovttaárvosašvuođa ovddidemiin gaskal nissoniid ja dievdduid sámi servodagas.
Bálkkašupmi sáhttá oažžut ovttaskas olbmot, joavkkut, fitnodagat, organisašuvnnat, ovttastumit, searvvit, skuvllat dahje eará almmolaš etahtat mat bargan dakkár bargguid, dahje čađahan doaibmabijuid mat leat nannen ja ovddidan dásseárvvu geavatlaččat.
Dásseárvobálkkášupmi lea dáidda ja ruhtasupmi mas lea oktasaš árvu ru. 50.000,-.
Sámediggepresideantta sáhkavuorru geigema oktavuođas
Gudnejahttojuvvon bálkkašumi vuoiti!
Guossit ja guldaleaddjit!
Munnje lea stuora illun beassat geiget jagi 2006 dásseárvobálkkašumi.
Bálkkašumi ulbmilin lea movttiidahttit eanet áŋgiruššat dásseárvvu ja ovttaárvosaš¬vuođa ovddidemiin dievdduid ja nissonolbmuid gaskkas sámi servodagas. Vuoitis leat leamaš ollu luohttámušdoaimmat maid oktavuođas son lea bargan hui áŋgirit dáid áššiiguin. Dán jagáš vuoiti lea olmmoš guhte lea váldán hástalusa čalmmus¬tahttit iežas dakkár ealáhusas man mearrideaddji orgánain lea leamaš nubbi sohka¬bealli eanetlogus. Dasto lea vuoiti dihtomielalaččat deattuhan ahte buot bargguin dán ealáhusa siskkobealde lea seamma stuora árvu ja berre oainnusin dahkko¬juvvot. Sámediggi rámiida vuoiti su barggu ovddas, ja sávvá ahte dát bálkkašupmi movttiidahtášii, sihke bálkkašumi vuoiti ja earáid geat barget dásseárvvuin.
Ovdal lea dán jagáš balkkašumi vuoiti bargan oahpaheaddjin ja journalistan. Dál son bargá boazodoallin ovttas beallelaččainis ja mánáidisguin. Dan lassin lea bálkkašumi vuoiti vuođđudan alccesis duodjefitnodaga, ja lea máhtolašvuođainis ja hutkái¬vuođainis ožžon alla árvvu duodjeealáhusas.
Bálkkašumi vuoiti lea bargan dan ala ahte duodji galgá leat lunddolaš oassi boazo¬doalu beaivválaš eallimis. Dán barggu bokte lea ovddeš buolvvaid sámenissoniid mearkkašupmi buktojuvvon ovdan ja čalmmustahttojuvvon.
Vuoiti lea ollu jagiid bargan dásseárvvu ovddidemiin boazodoalus, ja dáinna lágiin čalmmustahttán nissonolbmuid saji ealáhusas. Son lea leamaš Buolbmát badje¬olbmuid¬searvvi jođiheaddji olles guoktenuppelogi jagi, ja lea 2004 rájes leamaš Norgga Boazosápmelaččaid Riikkasearvvi (NBR) stivralahttu. Dál lea bálkkašumi vuoiti dán organisašuvnna nubbijođiheaddji.
Son lei guhtta jagi NBRa áirras Boazodoalu ekonomiijalávdegottis, mii lea stáhta lávdegoddi mii ráhkada daid ekonomalaš vuođđoávdnasiid, mat geavahuvvojit stáhta ja boazodoalu gaskasaš šiehtadallamiid vuođđun. Dán lávdegottis lea son erenoamážit rahčan nissonolbmuid dietnasa ovddas. Sáhtán namuhit ovtta dain bohtosiin, maid su evttohusat leat olahan Ekonomiijalávdegottis, namalassii movt boazodoalus sáhttá mihtidit nissonolbmuid bargoáiggi. Son lea maiddái leamaš mielde NBRa šiehtadallanlávdegottis máŋgii ja lea álo bohciidahttán beroštumi daidda doaibmabijuide, mat erenoamážit bohtet nissonolbmuide buorrin.
Sámedikki jagi 2006 dásseárvobálkkašumi vuoiti lea ollu searaidis geavahan čalmmustahttit nissonolbmuid saji boazodoalus. Sutnje lea leamaš deaŧalaš bajidit ealáhusa nissonolbmuid barggu árvvu. Dán son lea dovddahan sihke doppe gos mearrádusat dahkkojuvvojit ja servodagas muđuige. Son lea ovdagovvan sihke nuorra ja boarráset nissonolbmuide ja lea movttiidahttán sin. Daddjojuvvo bálkkašumi vuoiti birra ahte son lea čeahppi oažžut evttohusaidis dohkkehuvvot, ja ahte son dávjá ovttasbarggu bokte gávdná čovdosiid.
Sámedikki jagi 2006 dásseárvobálkkašumi vuoiti lea Ellinor Guttorm Utsi.
Sámedikki bealis sávan lihku bálkkašumiin, ja sávan dutnje lihku viidáset bargguin dásseárvvu vuoiŋŋas.
Dásseárvobálkkášumi lávdegotti
Dásseárvobálkkášumi lávdegotti lea nammadan Sámediggeráđđi ja lahtut leat:
- Marie Therese Nordsletta Gaup
- Tor Mikalsen
- Tone Finnesen
- Kirsten Appfjell
- Johan Mikkel Sara
Almmuhan
Kuhmunen, John-Marcus.
Maŋumustá rievdaduvvon 03.03.2006