Sámedikki boahttevaš duodjedieđáhusa oktavuođas bovdet ealáhusdoaimmaheddjiid ja eará berošteddjiid konferánsii Kárášjohkii ođđajagimánu 27.-28. b. Duodjeealáhusa hástalusat, ja mo Sámediggi sáhttá veahkehit, leat muhtun dain fáttáin maid mii áigut digaštallat.
Konferánssas lea buotbeallásaš ja gelddolaš prográmma. Earret eará lea Sámiid Duojis ja Duojáriid ealáhussearvvis sáhkavuorru duoji birra kulturguoddin ja ealáhussan, višuvnnaid, hástalusaid ja mihttomeriid birra ovddasguvlui. Sámiráđđi muitala oktasašsámi barggu birra duoji nannemiin, ja Duodjeinstituhtta fas muitala ovddidandoaimmaid birra duojis.
Viidáseappot váldá duojár Lilian Urheim ovdan fáttá Design ja duodji, ja Jacob Adams fas ságasta duoji riektesuodjalusa birra.
Oassálastiid ovddas, geat bohtet olggobealde Finnmárkku, gokčá Sámediggi mátkki ja orruma 10 olbmo ovddas gitta 5 000 ru rádjai juohke olbmo nammii. Finnmárkku ássiid ovddas gokčá Sámediggi lunšša ja mállásiid.
Eanet dieđut ja dieđiheapmi konferánsii leat dás.
Dieđihanáigemearri: 23.12.2015
Eanet dieđuid addá:
Ráđđeaddi Vivi Pedersen, tel. 78 47 40 13