Sámediggi deaivvada Dearvvašvuođaministariin Bent Høie:in odne. Čoahkkima fáddán leat dearvvašvuođa- ja fuolahusfálaldat gielddadearvvašvuođa sámi buhcciide, Sánaga viidásetovddideapmi, sámi dearvvašvuođapárkka ásaheapmi ja stivraáirasiid nammadeapmi regionála ja vuollásaš dearvvašvuođadoaimmahagaide. Dát doaibmabijut leat hui deaŧalaččat sámi álbmogii, dadjá Sámediggeráđđi Henrik Olsen
Sámi bálvalusaid ja dearvvašvuođaásahusaid huksen
Sámediggi háliida ahte dearvvašvuođabálvalusat láhččojuvvojit buorebut, erenoamážit lulli- ja julevsámi guovllu sámi álbmogii. Mii lea fuolastuvvan go suohkaniin ii leat doarvái dihtomielalašvuohta sámi buhcciid dárbbuid ektui, dadjá Sámediggeráđđi Henrik Olsen.
-Báikkálaš dearvvašvuođalágádusa ođasmahttima oktavuođas livččii guovllumedisiinnalaš guovddáža ásaheapmi lávki dan guvlui ahte ovddidit dásseárvosaš bálvalusfálaldagaid julevsámi guovllu sámi buhcciide, dadjá Olsen.
-Maiddái Sámi dearvvašvuođapárkka huksen livččii deaŧalaš go galgá oažžut ollesárvosaš sámi dearvvašvuođabálvalusa, ja das fertejit sihkkarastojuvvot dássidis ekonomalaš rámmat ja ovdánanvejolašvuođat. Mii dárbbašit čielga nationála láidestusaid vai mii lihkostuvvat dainna, dadjá Sámediggeráđđi Henrik Olsen.
Sámi dearvvašvuohta boahtteáiggis
Barggus ođđa Nationála dearvvašvuođa- ja buohcceviessoplánain lea deaŧalaš ahte Sámediggi váldojuvvo mielde árrat, vai mii sáhttit fuolahit ahte sámi buhcciid dárbbut ja vuoigatvuođat váldojuvvojit mielde buoremus lági mielde, dadjá Olsen.
Sámedikki váikkuhanfápmu regionála ja vuollásaš dearvvašvuođadoaimmahagaid nammademiide lea uhccon. Dat mielddisbuktá uhcit váikkuhanfámu dasa ahte sihkkarastit dásseárvosaš dearvvašvuođa- ja sosiálabálvalusaid sámi álbmogii.
-Mii bivdit dearvvašvuođaministara sihkkarastit Sámediggái nammadanvuoigatvuođa dearvvašvuođadoaimmahagaide, dadjá Sámediggeráđđi Henrik Olsen loahpas.
