Pressemelding fra NASCO 2013.pdf 87,21 kB
Sámediggi bidjá álgoálbmogiid riikkaidgaskasaš luossaovttasbarggu beaiveortnegii. Boahtte jagi gieđahallojuvvo álgoálbmogiid guollebivdu NASCO erenoamášsešuvnna prográmmas luossahálddašeami sosioekonomalaš beliid birra.
- Mun lean hui ilus go bealit NASCO:s oidnet ávkki álgoálbmot guollebivddu čuvgeheamis, dadjá Sámediggeráđi lahttu Marianne Balto.
Norggas lea NASCO rávvagiin stuorra váikkuhus stáhta luossabivdoreguleremiidda sihke mearas ja jogas. Sámediggi háliida searvamiin oainnusmahttit ahte NASCO bargui dárbbašuvvo álgoálbmotperspektiiva.
NASCO - North Atlantic Salmon Conservation Organization lea stáhtaid organisašuvdna mii hálddaša luondduluosaid. Sámedikki dievasčoahkkin celkkii 2012:s ahte lea dárbu heivehit álgoálbmotdimenšuvnna NASCO luossaovttasbarggu riikkaidgaskasaš njuolggadusaide . Sámediggi ozai 2012:s áicistáhtusa NASCO:s ja ohcamii mieđihuvvui seamma jagi.
Dán vahkus lea Sámediggi vuosttaš gearddi ovddastuvvon NASCO:s go doallá jahkásaš čoahkkimis Droghedas, Irlánddas. Goassige ovdal ii leat álgoálbmotparlameanta addán njuolga rávvagiid NASCO:i.
- Mun háliidan rámiidit NASCO go lea addán álgoálbmogiidda liibba ovddidit áššiideaset. Dát duođašta dan ahte lea áddejumi riikkaidgaskasaččat dan birra ahte luossa lea deaŧalaš oassi álgoálbmogiid luondduvuđđosis, dadjá Sámediggeráđi lahttu Marianne Balto.
Sámediggi deattuhii sáhkavuorustis man deaŧalaš álgoálbmogiidda lea beassat searvat dalle go riikkaidgaskasaš konvenšuvnnat ja njuolggadusat mat gusket álgoálbmogiid resursavuđđui hábmejuvvojit ja dulkojuvvojit. Sámediggi čujuhii erenoamážit dan man dárbu lea heivehit álgoálbmotperspektiivva njuolga NASCO njuolggadusaide. Sámediggi čuvgehii ahte lea dárbu ahte NASCO dovddasta man deaŧalaš lea geavahit árbedieđuid dego oassin máhttovuođus riikkaidgaskasaš luossaovttasbarggus.
Luossabivdu lea sámi ealáhusaid deaŧalaš luondduvuođus ja kulturguoddi sámi guovlluin. Sámediggi čilgii NASCO:i dan garra deattu birra maid sámi guolásteaddjit vásihit earáid beales geat háliidit geavahit juogo luossaresurssa dahje daid seamma guovlluid maid báikkálaš guollebivdit geavahit. Erenoamážit deattuhuvvojedje hástalusat mat leat mearrasámi guolástusas.
- Dát lea ođđa arena midjiide. Mun oaivvildan ahte mun lean olahan ovddos NASCO:s buori vuogi mielde. Dát addá doaivaga sámi guolásteddjiide, dadjá Sámediggeráđi lahttu Marianne Balto loahpas.
Gulahallit:
Sámediggeráđđi Marianne Balto, tlf. 480 43 968.
Pressemelding fra NASCO 2013.pdf 87,21 kB
