2012:s lea čuohte jagi vássán dan rájes go vuosttaš sámi romána ilmmai, namalassii ”Bæivve-Alggo” maid Anders Larsen čálii, son lei eret Návuonas Romssas. Dát čalmmustahttojuvvo dál goargugirjjiin ”Om sjøsamene”, mii adnojuvvo Larsena dahkosiid gaskkas leat okta dain deaŧaleamos dahkosiin. Sámediggeráđi lahttu Vibeke Larsen rámiida 100-jagi čalmmusteami álgaga.
- Sámi girjjálašvuohta lea deaŧalaš sámi giela ja kultuvrra guoddi, ja dán oktavuođas maiddái min sámi historjái. Anders Larsen ii lean dušše erenoamáš čeahpes sámi girječálli, muhto son lei maiddái nana ja čielga jietna sámi áššiin garra dáruiduhttinpolitihka áiggis. Mun illudan oaidnit ávvugirjji ja buorebut oahpásmuvvat sihke girječálliin ja min lagaš historjjáin, dadjá sámediggeráđi lahttu Vibeke Larsen.
Girji mearrasámiid birra adnojuvvo eahpitkeahttá leat Anders Larsena deaŧaleamos dagusin. Girjjis čállojuvvo mearrasámiid eallima birra Finnmárkkus ja Romssas sámi historjjá nuppástuhttináiggis, ja das govviduvvo sihke teavsttaiguin ja govaiguin mearrasámiid eallin ja eallinvuohki nugo dat lei álgogeahčen ovddit čuohtejagi.
Sámi lágádus ČálliidLágádus lea vuolggahan jurdaga almmuhit ávvugirjji. Girjji leaba čállán Ivar Bjørklund, Romssa museas, ja Harald Gaski, Romssa universitehta kultur- ja girjjálašvuođa instituhtas. Sámediggeráđđi doarju ávvugirjji gitta 150 000 ru rádjai.
Gulahallan:
Sámediggeráđi lahttu Vibeke Larsen, tel. 941 30 116.