Kanada álgoálbmogat ja olbmot geat dorjot sin gáibádusaid, leat lagabui guokte mánu čađahan miellačájáhusaid oktilaččat miehtá riikka oainnusmahttin dihte ahte kanadalaš ráđđehus soames mearrádusaid bokte lea mearridan gáržžidit riikka álgoálbmotrivttiid.
Álgoálbmogiid ráfálaš miellačájáhus, namain “Idle No More”, lea dakkár lihkadus maid dorjot maiddái hui ollu earát kanadalaš servodagas. Sámediggi lea fuolas dili geažil ja áigu earret eará váldit ovdan ášši Kanada dearvvašvuođaministariin, gii giđđat vel váldá badjelasas Árktalaš ráđi ovdagoddeovddasvástádusa.
-Mun háliidan Sámedikki bealis dovddahit ahte mii doarjut Kanada álgoálbmogiid rahčamušaid. Erenoamážit balan mun Attawapiskat-našuvnna Chief Theresa Spence dearvvašvuođa dili geažil, gii dál measta mánu lea nealgudan ja vuostálastán Kanada álgoálbmogiid gáržžes sosiála- ja ekonomalaš dili mii sis lea. Mu mielas lea lunddolaš ahte dát lea okta dain fáttáin maid mun áiggun váldit ovdan dalle go deaivvadan Kanada dearvvašvuođaministariin Árktalaš ráđis ođđajagimánu 20. b., dadjá Sámedikki presideanta Egil Olli.
Vuosttaldeamit leat dál bistán váile guokte mánu, mat álge dan geažil go álgoálbmotrievttit láhkarievdadusaid bokte gáržžiduvvojedje, almmá makkárge konsultašuvnnaid dahje miehtama bokte álgoálbmoga bealis. Vuosttaldeamit vearránedje dalle go Attawapiskat-našuvnna Chief Theresa Spencejuovlamánu 11. b. nealgudišgođii vuosttaldeapmin gáržžes sosiála ja ekonomalaš dillái mii Kanada álgoálbmogis lea. Nealgudanakšuvdna lea ain bistimin.
-Idle No More ja álgoálbmotlihkadus maid mii oaidnit Kanadas lea garra signála eiseválddiide ahte álgoálbmogiid olmmošvuoigatvuođaid váilun ii leat dohkálaš. Álgoálbmogiin lea vuoigatvuohta suodjalit sin identitehta ja kultuvrra, ahte eiseválddit árvvus atnet historjjálaš šiehtadusaid maid dat leat dahkan, ahte álgoálbmogiin lea vuoigatvuohta iežaset árbevirolaš eatnamiidda ja resurssaide, ja vuoigatvuohta árjjalaččat searvat mearrádusproseassaide mat guoskkahit sin, dadjá Sámedikki presideanta Egil Olli.
-Mii registreret ahte Kanada stáhtaministtar Steven Harper háliidivččii deaivat Spence ja eará álgoálbmotjođiheddjiid ođđajagimánu 11. b. Sámediggi ávžžuha Kanada eiseválddiid doaibmat daid prinsihpaid mielde mat bohtet ovdan ON álgoálbmotvuoigatvuođaid julggaštusas (álgoálbmotjulggaštus), masa Kanada lea guorrasan, dadjá Olli.
Sámedikki presideanta Egil Olli čujuha ahte ON álgoálbmotvuoigatvuođaid julggaštusa bokte dohkkehuvvo ahte álgoálbmogiin lea vuoigatvuohta mearridit ja hábmet vuoruhemiid ja strategiijaid dan ektui movt sin riekti ovdáneapmái galgá geavahuvvot, maiddái vuoigatvuohta mearridit ja hábmet vuoruhemiid ja strategiijaid dan ektui ahte ovddidit dahje geavahit eatnamiid, guovlluid ja resurssaid. Álgoálbmotjulggaštus lea maiddái čielggas dan ektui ahte stáhtat buori jáhkuin, konsultašuvnnaid bokte ja ovttasbargguin álgoálbmogiiguin, galget oččodit sin friija ja dieđihuvvon ovddalgihtii miehtama ovdalgo mearridit ja čađahit lágaid dahje hálddahuslaš doaibmabijuid mat sáhttet guoskat sidjiide. Sámedikki presideanta čujuha maiddái ahte álgoálbmotjulggaštusa bokte mearriduvvo ahte álgoálbmogiin lea vuoigatvuohta dohkkehuvvot, soahpamušat galget dollojuvvot ja čađahuvvot, ja šiehtadusat ja konstruktiiva ortnegat maid leat dahkan stáhtaiguin dahje stáhtaid čuovvuiguin, ja sáhttet gáibidit ahte stáhtat doahttalit ja gudnejahttet dán lágan soahpamušaid, šiehtadusaid ja konstruktiiva ortnegiid.
-Sámediggi ávžžuha Kanada eiseválddiid konsultašuvnnaid ja ovttasbarggu bokte riikka álgoálbmogiiguin – jođáneamos lági mielde čađahit beaktilis doaibmabijuid maid bokte ollašuhttit álgoálbmogiid vuoigatvuođaid, dávistettiin dohkkehuvvon riikkaidgaskasaš standárddaide, dadjá loahpas Sámedikki presideanta Egil Olli.