Mental Helse Ungdom prošeakta galgá kártet nuorra sámiid psyhkalaš dearvvašvuođa ja bidjat johtui eastadeaddji doaibmabijuid mat buoridit suddjenfáktoriid nuorra sámiid identitehtas ja psyhkalaš dearvvašvuođas. Kárten galgá addit máhtu das movt nuorra sámit vásihit iežaset psyhkalaš dearvvašvuođa ja makkár suddjenfáktoriid ja riskafáktoriid nuorat vásihit.
– Mu mielas dát lea buorre prošeakta, ja sámediggeráđi bealis lean ilus go Mental Helse Ungdom háliida bidjat johtui dákkár prošeavtta. Dákkár prošeakta boahtá addit buori máhtu sámi nuoraid psyhkalaš dearvvašvuođa birra, lohká Mikkelsen.
Sámi organisašuvnnaid searvan
Prošeavttas galgá Mental Helse Ungdom bargat ovttas sámi nuoraidorganisašuvnnain Noereh, Sámedikki politihkalaš nuoraidlávdegittiin (SáNuL) ja sámi nationála gealboguovddážiin – psyhkalaš dearvvašvuohta (SÁNAG), ja čujuha dasa ahte prošeakta ollislaččat lea dan duohken ahte sámi nuoraidorganisašuvnnat servet olles prošektii.
Mikkelsen mielas lea buorrin prošektii ahte Noereh, SáNuL ja SÁNAG leat mielde prošeavttas.
– Sii dovdet sámi servodaga, nu ahte prošeakta sáhttá lihkostuvvat. Sámedikki bealis oaidnit mii dán guokte nuoraidorganisašuvnna čeahppin ja servodatberošteaddjin, ja sin searvan lea guovddáš fápmun prošektii, lohká Mikkelsen.
Dehálaš máhtuin
Sámediggi lea iežas barggus sorjavaš buot máhttovuođus, ja ohcala dávjá fáktadieđuid sámi servodaga ja dearvvašvuođavuđot gávdnosiid sámiid dearvvašvuođa birra. Mikkelsen mielas sáhttá dát kárten buktit Sámediggái ja eará stivreninstitušuvnnaide reaiddu doaibmabijuide boahtteáiggis mat sáhttet buoridit sámi mánáid ja nuoraid psyhkalaš dearvvašvuođa.
– Máhttovuođđu boahtá leat vuođđun doaibmabijuide máŋgga dásis. Veahkkeapparáhtta sáhttá oažžut ođđa máhtu, mii fas mielddisbuktá ahte sii sáhttet buorebut veahkehit sin geat dan dárbbašit, loahpaha sámediggeráđđi Mikkel Eskil Mikkelsen.
Eanet dieđuid dahje jearahallama oaččut go válddát oktavuođa sámediggeráđiin Mikkel Eskil Mikkelsen, mob. +47 917 42 161.