Maŋebárgga guovvamánu 25. b. mearridii Sámediggeráđđi doarjut Riddoakšuvnna 70 000 ruvnnuin sin čalmmustahttimii Stuorradikki olggobealde njukčamánu 3. b.
- Riddoakšuvdna lea deaŧalaš álgga ja mii Sámedikki bealis áinnas doarjut, maiddái ekonomalaččat, dan go riddoálbmot dál čuožžilit bealuštit iežas vuoigatvuođaid, dadjá Silje Karine Muotka, geas sámediggeráđi bealis lea guolástanpolitihkalaš ovddasvástádus.
Muotka doarju daid politihkalaš gáibádusaid maid Riddoakšuvdna ovddida.
– Lea áibbas čielggas ahte báikkálaš álbmot galgá ávkašuvvat iežaset riggodagaiguin. Sis leat vuoigatvuođat mearraresurssaide, ja dat ahte feastonuohttefatnasat galget gáddet guoli báikkálaš guollevuostáiváldimii, berre leat áibbas čielggas. Dat han gullá servodatšiehtadussii.
Dáinna ekonomalaš doarjagiin sávvá Sámediggeráđđi beassat mielde váikkuhit dan ahte eanebut fuobmájit dan mii Muotka mielas lea riddoálbmoga vuoigatvuođaid rievideapmi.
– Doaivvun eanebut fuobmájit dan vearrivuođa maid riddoálbmot čađat ferte gillát. Dávjá ii leat sis vuoigatvuohta guolástit ii ge dáhkádus dasa ahte guolli boahtá sin giliid vuostáváldinrusttegiidda. Hui ollu servodagat lea vuođđuduvvon guolásteapmái, ja guolásteami haga lea ballu ahte servodagat goarránit. Danne mii doarjut akšuvnna dievaslaččat, loahpaha ráđđelahttu Muotka.
Gulahalli:
Ráđđelahttu Silje Karine Muotka, tel. 984 87 576