Sámediggi guovddážis guolásteami reguleremis Deanučázádagas

- Luossabivddus Deanučázádagas lea stuora mearkkašupmi báikkálaš olbmuide. Lea dehálaš ahte báikkálaš vuoigatvuođat guolásteapmái vuhtiiváldojuvvot dohkálaččat go stáhtat šiehtadallet ođđa šiehtadusa. Sámediggi galgá leat guovddážis dán barggus, lohká sámediggeráđđi Marianne Balto.

Gáibideaddji šiehtadallamat

Šiehtadallamiid ulbmil lea oažžut sadjái ortnegiid mat leat heivehuvvon nálledillái ja mii lea buoremussan báikkálaš olbmuide. Maŋimus šiehtadus gaskal Norgga ja Suoma lea 1989 rájis. Norgga šiehtadallansáttagoddi galgá čoahkkanit njukčamánu ráhkkanandihti šiehtadallamiidda.

- Dát šiehtadallamat lea gáibideaddji, erenoamážit dákkár dilis gos sihke dutkit ja báikkálaš olbmot vuorjašuvvet luossadili dihtii, lohká sámediggeráđđi  Marianne Balto 

Sámedikki ovddasteaddji

Finnmárkolágas daddjo ahte sihke Sámediggi ja báikkálaš hálddašanorgána, Deanujoga guolástushálddašeapmi, galgaba searvat šiehtadallamiidda. Sámedikki ovddasteaddji lávdegottis lea Liss- Ellen Ramstad Deanus eret. Son lea ráđđeaddi vuoigatvuođajuhkosis Sámedikki hálddahusas ja sus lea riektesosiologiijaoahppu Oslo universitehtas.  

- Liss- Ellen Ramstad:s lea duogáš guorahallan- ja lávdegoddebargguin mearra- ja johkaguolásteamis  ja mii leat hui duhtavaččat go son galgá ovddastit Sámedikki dán dehálaš barggus, dadjá Marianne Balto. Stuora árvuLuosas lea stuora árvu ovddemus báikkálaš olbmuide, muhto leat oallut earát geaidda luossa lea dehálaš ja loahpaloahpas lea buohkain ovddasvástádus seailluhit dán resurssa buolvvaide boahtteáiggis.

- Mu mielas lea buorre go lea vejolaš gávdnat buriid čovdosiid mat vuhtiiváldet sihke luosa ja luossabivdokultuvrra čázádagas, lohká sámediggeráđđi Marianne Balto loahpas.  

Gulahallanolmmoš: Ráđđeaddi Liss-Ellen Ramstad. Tel. 958 09 451, e-poasta: lill-ellen.ramstad@samediggi.no