Sámediggi bargá aktiivvalaččat ovddidit sápmelaččaid beali suohkanođastusas proseassas. Earret eará leat bidjat johtui guorahallama mii guoskkaha muhtun daid fáttaide mat gusket sápmelaččaide suohkanođastusas. Sámediggi bovde dál serviid, organisašuvnnaid, berošteddjiid ja eaŋkilolbmuid buktit oaiviliid sámi beliid birra suohkanođastusa barggus.
-Sámediggái lea dehálaš ahte buot sápmelaččaid oaidnu boahtá ovdán ja danin bivdit buohkaid sáddet e-poastta bokte midjiide oaiviliid ja jurdagiid sámi beliid ja suohkanođastusa birra. Dán ođđa vuogi mielde mii sávvat ahte olbmuide šaddá álki buktit oaiviliid ja jurdagiid njuolga Sámediggái, lohká Sámedikki ráđđeláhttu Ann-Mari Thomassen.
E-poasta ii dárbbaš leat guhkes teaksta, dušše oanehaččat dan birra ahte mii sáhttá leat hástalus suohkanođastusas ja vaikko vel evttohusat čovdosiidda.
-Makkár váikkuhusaid sáhttá du mielas suohkanođastus buktit sámegillii, oahpahussii, dearvvašvuođasuorgái dahje areálageavaheapmái? Makkár rievdadusaid berrešii boahtit suohkanhálddašeamis vai suohkanođastus boađášii buorrin sámi ássiide? Dá lea muhtun gažaldagat masa háliidivččiimet oažžut vástádusaid, lohká Thomassen.
E-poasta sáhttá sáddet dán e-poasta čujuhussii: kommunereform@samediggi.no.
Sámediggi sávvá oažžut e-poasttaid ovdal geassemánu 10. b.
Eambbo dieđuid Sámedikki barggu birra gávdno dán neahtta siiddus http://www.samediggi.no/Suohkanodastus.
Eanet dieđut: Sámedikki ráđđeláhttu Ann-Mari Thomassen, 900 57 123