Kulturealáhusat leat riikka gelddoleamos ealáhusat ja dat ealáhusat mat sturrot johtilepmosit. Sámi servodagas dain leat guhkes árbevierut, ja stuorra vejolašvuođat. lea dál ráhkadeamen strategiija lasihan várás barggolašvuođa sámi kulturealáhusain. Dán bargui háliida ráđđelahttu Marianne Balto bovdet kulturealáhusoassálastiid buktit árvalusaid dasa mii dán strategiija sisdoallu berre leat.
Sámediggi lea 2013:s ráhkadeamen doaibmaplána sámi kulturealáhusaid várás. Ovttas sámi kulturealáhusoassálastiiguin lea áigumuššan hutkat doaibmabijuid mat álkidit sámi kulturealáhushutkiid árgabeaivvi ja nannejit ealáhusa doppe gos dat dárbbašuvvo.
-Mii háliidit nana áŋgiruššama sámi kulturealáhusaiguin mii galgá sihkkarastit ahte eanebut sáhttet boahtteáiggis birget sámi dáidda- ja kulturovdanbuktimiiguin. Dasa lea buorre gulahallan sámi kulturealáhusoassálastiiguin deaŧalaš eaktun lihkostuvvamii, dadjá ráđđelahttu Marianne Balto.
Kulturealáhusaid birra
Sámediggi definere ealáhusa dán láhkai:Priváhta fitnodagat mat buvttadit ja vuvdet kulturbuktagiid gálvo- dahje bálvalushámis. Dát definišuvdna fátmmasta buot smávva ovttaolbmofitnodagaid rájes gitta stuorát fitnodagaid rádjai. Kulturealáhusoassálastiid eallingeaidnun lea vuovdit iežaset buktagiid márkaniidda ja sii háliidit doaimmahit – dahje doaimmahit dál gánnáhahtti ealáhusa. Oassin dietnasis sáhttet maid leat almmolaš doarjagat dahje eará veahkki. Mátkeealáhus adnojuvvo leat sierra ealáhussan, mas sámi kulturelemeanta lea deaŧalaš oassi fitnodaga doaimmas.
Sámedikki áŋgiruššan kulturealáhusaiguin lea lassi dan govda áŋgiruššamii mii mis dál juo lea sámi dáidagiin ja kultuvrrain. Dat lea hui deaŧalaš eaktun dasa ahte mis galgá leat ealli ja nana sámi dáidda- ja kultureallin, dan haga ii livčče min kulturealáhus mange veara.
Áigemearri buktit árvalusaid: 18.04.2013
http://www.sametinget.no/Naeringer/Kulturnaering/Innspill-til-sametingets-kulturnaeringsstrategi
Gulahalli:
Prošeaktajođiheaddji Ragnhild Dalheim Eriksen, + 47 784 74 088, ragnhild.dalheim.eriksen@samediggi.no