Ráđđehus mearridii juovlamánus neavvut Nuvvosgohpi oarji buoremus molssaeaktun Girkonjárgga ođđa hámmanin. Sámediggi ii leat konsultašuvnnaid Johtolatdepartemeanttain miehtan dasa boazodoalu vuhtiiváldima geažil. Kvalitehtasihkkarastinrápportas boahtá ovdan ahte hámmana huksema váikkuhusat bohtet čuhcet eanemusat Nuvvosgohpi oarjái ja ahte lea dárbu čielggadit boazodoaluin álggos.
Sámediggi lea maid vuosttaldan gielddaplána areálaoasi evttohusa geažil ásahit industriijaguovllu Geresnjárgii, mii maid lea oarjjabealde Hirsanjárgga. Huksen oktan dasa gulli geainnuin sáhttá váikkuhusčielggademiid vuođul dahkat hui váttisin sirdit bohccuid Hirsanjárgii ja doppe eret. Váikkuhusčielggadeamit čujuhit ahte vearrámus dilis ii sáhte Hirsanjárgga geavahit guohtumii. Hirsanjárgga guohtunresursa dagaha siidaoasi ja jus resursa jávká, de sáhttet muhtumat fertet heaittihit ealáhusaset. Álgoálbmoga árbevirolaš ealáhusa gieldin sáhttá leat álbmotrievtti rihkkun.
- Sámediggi bisuha ieža vuosttaldeami gielddaplánii. Mii ávžžuhit gieldda gávdnat čovdosii gulahallama bokte ja vejolaččat váidudeaddji doaibmabijuid bokte mat maiddái fuolahit guovllu boazodoalu, dadjá Wilhelmsen.
Vejolaš ođđa hámmana ja geainnuid ásaheapmi vuolggahit dárbbu dárkilat plánemii.
- Sámediggi áigu árvvoštallat konkrehta čovdosiid boahttevaš plánaproseassain, ovdamearkka dihtii muddenplánain geainnuid várás. Muddenplánaproseassas mii gáibidit ahte váikkuhusat boazodollui ja vejolaš váidudeaddji doaibmabijut čielggaduvvojit lagabui, dadjá Wilhelmsen.