Vuossárgga miessemánu 4. b. lei sámediggeráđis Ann-Mari Thomassenas čoahkkin Bodåddjo sátnejođiheddjiin, Ole-Henrik Hjartøy:in ja eallineavttuidlávdegotti jođiheddjiin, Else Marie Torp:in. – Mii leat soahpan ovttasbargošiehtadusa das movt ovdánahttit sámi giela ja kultuvrra ja movt nannet sámevuođa Bodåddjos, cealká Thomassen maŋŋá čoahkkima.
Ovttasbargošiehtadus lea dahkkojuvvon Bodåddjo suohkana álgaga mielde, ja dat galgá meannuduvvot politihkalaččat Sámedikki dievasčoahkkimis geassemánus, ja Bodåddjo suohkanstivrras 18.06.15.
- Mun háliidan rámiidit Bodåddjo suohkana dán álgagis. Movttiidahttá oaidnit go eanet gávpotsuohkanat háliidit sierra šiehtadusaid Sámedikkiin, cealká sámediggeráđđi Ann-Mari Thomassen.
Son deattuha dasto ahte Bodåddjos lea guhkes sámi historjá, sihke julev-, bihtán-, davvi- ja máttasámegiela váikkuhemiin, ja dáhkida ahte šiehtadus fátmmasta ja goziha dan.
Bodåddjo sátnejođiheaddji, Ole-Henrik Hjartøy, lea duhtavaš go šiehtadus Sámedikkiin fargga lea mearriduvvon.
- Mun lean movtta go mii dál oažžut ovttasbargošiehtadusa Sámedikkiin. Bodåddjos dahkkojuvvo juo ollu mii lea buorre sámi giela ja kultuvrra ovdánahttimiin, ja lea buorre go mii dál formaliseret dan.
Plána mielde galgaba Sámedikki presideanta ja sátnejođiheaddji vuolláičállit ovttasbargošiehtadusa borgemánu 8. b. 2015 Bodåddjos, ja dat dahkkojuvvo Norlándda musihkkafestivála vahku doaluid ja riikkaidgaskasaš álgoálbmotbeaivvi borgemánu 9. b ávvudeami oktavuođas.
Dás sáhtát don lohkat ovttasbargošiehtadusa.
Gulahallanolmmoš:
Sámediggeráđđi Ann-Mari Thomassen, tel. 900 57 123
Bodåddjo sátnejođiheaddji Bodø Ole-Henrik Hjartøy, tel. 905 88 345