– Dán šiehtadusa bokte mii sávvat sáhttit geavahit oktasaš návccaid buoret vuogi mielde, buorrin sámi servodagaide. Sihke LDO:s ja Sámedikkis lea gelbbolašvuohta iešguđet surggiin, ja šiehtadus galgá sihkarastit ahte diehtu juogaduvvo ja ahte oktasaš strategiijat ráhkaduvvojit. Mii sávvat ahte dát ovttasbargu sáhttá váikkuhit dasa ahte dehálaš servodathástalusat loktejuvvojit guovddáš eiseválddiide, nugo ovdamearkka dihte veahkaváldi lagas oktavuođain, lohká sámediggepresideanta Aili Keskitalo.
Sámediggi ja LDO dáhttot earret eará garraseappot áŋgiruššat bissehit vaššicealkámušaid ja rasismma sápmelaččaid vuostá, bissehit veahkaválddi nissoniid vuostá ja veahkaválddi lagas oktavuođain sámi birrasiin.
Árvalusčoahkkin
Sámediggi, Dásseárvo- ja vealahanáittardeaddji, ja Našunála ásahus olmmošvuoigatvuođaid várás lágidedje maid odne čoahkkima mas bivde sámi organisašuvnnaid, priváhta olbmuid ja almmolaš ásahusaid árvalit doaibmabijuid veahkaválddi vuostá lagas oktavuođain.
Sámediggeráđi bealis čuovuiga čoahkkima presideanta Aili Keskitalo ja ráđđelahtu Mikkel Eskil Mikkelsen.
– Lea dehálaš ahte buot buorit fámut ovttasbarget dáin fáttáin. Jaskatvuohta ja čiegadeapmi ii buvtte buorráneami. Ferte šaddat nu ahte lea ortnegis dieđihit veahkaválddi birra lagas oktavuođain sámi servodagas, ja ii unnimusat: guovddáš eiseválddit fertejit váldit dán fáttá duođas go Sámediggi bivdá veahki dáistalit veahkaválddi vuostá, lohká Keskitalo.
Ráđđehus galgá deaivat ON nissonlávdegotti skábmamánu 8. beaivvi dán jagi, ja sáhttá vuordit gažaldagaid maid Norga dahká suddjet ja veahkehit nissoniid geat vásihit veahkaválddi lagas oktavuođain. Sihke Sámediggi, LDO ja NIM servet čoahkkimii, ja sii áigot geavahit dan mii dán čoahkkimis bođii ovdan iežaset ávžžuhusain ráđđehussii dan ektui makkár doaimmat dárbbašuvvojit.
