Forslag til avtale Tromsø kommune og Sametinget.doc 95,50 kB
Sámediggi ja Romsa áigot dahkat ovttasbargošiehtadusa nannen dihtii sámegiela ja sámi kultuvrra Romssas, ja láhčet seammás vuođu buori ja guhkesáiggi ovttasbargui beliide.
Šiehtadusas lea ollislaš perspektiiva ja dasa gullá earret eará láhčit heivehuvvon gielddalaš bálvalusaide gávpoga sámi álbmogii. Eará mii gullá šiehtadussii leat dakkár doaibmabijut go diehtojuohkin, oahpahus, kultuvra, mánát ja nuorat, dearvvašvuohta ja sosiálabálvalusat. Sámediggi ja Romssa suohkan galget ovttas ráhkadit sierra máhttopáhka Romssa skuvllaid várás, ja mihttomearrin lea lasihit máhttodási sámi kultuvrra birra erenoamážit Romssa mánáid ja nuoraid birra.
- Sámediggi háliida lagat ovttasbarggu Romssa suohkaniin mas mii sáhttit bargat ulbmileappot čalmmustahttimiin sámegiela ja sámi kultuvrra buori, searvadahtti vugiin buot suohkana ássiid várás. Min šiehtadus lea áidnalunddot, vuosttaš dákkáraš, ja mun illudan go Romsa lea vuosttaš gávpotsuohkan sierra ovttasbargošiehtadusain Sámedikkiin, dadjá Sámedikki várrepresideanta Laila Susanne Vars.
Bealit leat ovttamielalaččat das ahte láhčit bistevaš sámi deaivvadansaji Romsii, já áigot gulahallama bokte ráhkadit eaiggát- ja stivrenvuogi dakkár deaivvadansaji várás. Áigumuššan lea čalmmustahttit sámi kultuvrra ja dahkan dan olahahttin ja oččodit arena sámi servodateallimii ja doaimmaide. Doaibmagolut guovddáža oktavuođas galget juogaduvvot sierra juogadanmálle vuođul, mas Sámediggi lea váldán badjelasas váldoovddasvástádusa.
- Lean erenoamážit ilus go mii leat ovttamielalaččat das ahte ovtta ásahit bistevaš deaivvadansaji Romssa gávpogii. Ollugat, sihke sápmelaččat ja earát, leat guhká jearahan dakkár deaivvadansaji gos sámi kultuvra lea olahahtti. Mii leat maid ovttamielalaččat das ahte sámi valáštallansearvi Real Romsa šaddá buorre doarjjan dan barggus ahte ásahit ja ovddidit sámi deaivvadansaji, dadjá várrepresideanta Laila Susanne Vars.
- Doaivumis lea nu ahte Romssa álbmot ja suohkanstivra oidnet man árvvolaš dakkár positiiva ovttasbargu Sámedikkiin lea ja mii leat gergosat čađahit eanet geatnegahtti proseassa šiehtadusa iešguđet beliid birra, dadjá Sámedikki várrepresideanta Laila Susanne Vars loahpas.
Gulahalli:
Sámedikki várrepresideanta, Laila Susanne Vars tlf. 977 54 102