Sámediggi áigu leat doppe go ON nissonkommišuvdna doallá jahkásaš sešuvnna New Yorkas guovvamánu 29. b. rájis njukčamánu 9. b. 2012 rádjái. - Dá lea okta deháleamos deaivvadanbáikkiin digaštallat nissoniid vuoigatvuođaid ja dásseárvogažaldagaid. Sámediggi áigu leat doppe čalmmustahttit sámi nissoniid ja min dásseárvohástalusaid áššiid, lohká Sámediggeráđi lahttu Vibeke Larsen. Larsen áigu leat doppe sešuvnna vuosttaš vahkku.
Báikegottiid nissonat fáddán
Váldofáddá dán jagá konferánssas leat nissonat báikegottiin olggobealde guovddáš báikkiid ja sin rolla geafivuođa ja nealggi vuostá rahčamis, ja ovdánahttingažaldagain. Sámediggi áigu dan bottas go lea doppe, searvat paneladigaštallamii mearkkašumi birra mii lea go álgoálbmotnissoniin báikegottiin lea seđolaš bargu.
- Dát leat áigeguovdilis fáttát sámi guovlluin go mii vásihit ahte oallut nuorra nissonat eai hálit orrugoahtit smávva sámi báikegoddeservodagain, lohká ráđđelahttu Vibeke Larsen. Seammás áigu Sámediggi čájehit doarjaga eará álgoálbmotnissoniidda. Álgoálbmotnissonat miehtá máilmmi servet eanet ja eanet bargomárkanii. Bargoeallimis leat ain áššit maid ovddas šaddá rahčat, nu go ahte nissonat galget oažžut dohkálaš bálkká, bargošiehtadusa ja sosiála ortnegiid. Viidáseappot lea dehálaš ahte nissoniid rolla ja návccat árbevirolaš ealáhusain čalmmustahttojuvvojit ja árvvusadnojit. Dása lea sámi nissoniid rolla boazodoalus buorre ovdagovva, ja maid mii áigut váldit bajás New Yorkas, lohká Larsen.
Loktet árvvu
Oassálastin dákkár riikkaidgaskasaš arenain lea buorre liiba bidjat gažaldaga oidnosii, mii guoská sámi álbmogii. Dat sáhttá maid váikkuhit dasa ahte lokte árvvu dáin áššiin ja bidjá našunála eiseválddiid rahčat. Sámi nissonat leat ollen guhkás go geahččá dásseárvui. Dan háliidit mii juogadit earáiguin. Seammás leat mis ain ollu hástalusat dásseárvosuorggis maid lea dehálaš čalmmustahttit.
Oassálasti: Lahttu Sámediggeráđis Vibeke Larsen, tlf. 941 30 116
Oktavuođaolbmot:
Seniorráđđeaddi Ingeborg Larssen, tlf. 78 47 40 49
Seniorráđđeaddi Toril Iversen, tlf. 78 47 40 17