Sámediggi doallá boraspireseminára Romssas njukčamánu 21. ja 22. b. Seminárain háliida Sámediggi fokuseret boraspirehálddašeami sámi guovlluin. – Mun lean hui fuolas boraspirevahágiid geažil boazodoalus ja sávzadoalus, dadjá Sámediggeráđi lahttu Ellinor Marita Jåma.
- Dilli muhtun guovlluin lea nu suorggahahtti ahte muhtun boazodoallit fertejit oastit ealihanbohccuid go masset nu ollu bohccuid boraspiriide. Mun lean maiddái oaidnán ahte sávzaboanddat leat heaitán doaluin juste boraspiriid geažil, dadjá ráđđelahttu Ellinor Marita Jåma viidáseappot.
Semináras biddjojuvvojit guovddážii maiddái dat gillámušat maid stuorra boraspirevahágat leat dagahan boazodolliide. Sámediggeráđi lahttu Ellinor Marita Jåma čujuha maiddái ahte dán beali ge ii heive vajálduhttit boraspirehálddašeamis.
Nubbi eará mii lea guovddážis dán semináras lea álgoálbmotriekti ja movt dát riekti doaibmá boraspirepolitihka ektui.
- Mii doaivut ahte dán seminára bokte Sámediggi sáhttá čuvget boraspirepolitihka eará vuolggasajis go dábálaččat, cealká Sámediggeráđi lahttu Ellinor Marita Jåma loahpas.
Oktavuođaolmmoš:
Ráđđelahttu Ellinor Marita Jåma, tlf. 916 13 460.