"Sámediggi garrasit vuostálastá čearddalašvuođa iskamiid ja propagánddaid anti-sámi čoahkkimis.
Sámediggi čujuha čoahkkimii maid Selbu utmarksråd ja Roltdalen allmennunsstyre lágideigga Selbus 06.06.19.
Sámediggi vuostálastá garrasit dán anti-sámi lágideami, man ulbmilin orru leamen gilvit konspirašuvdnateoriijaid ja boasttudieđuid sápmelaččaid, sámi rivttiid ja Sámedikki birra.
Lágideaddjit eai lean fuolahan ahte lágideamis livčče leamaš dássedettolaš logaldallamat ja kritihkalaš perspektiivvas, muhto válljeje duššefal muhtun ekstrema logaldalliid logaldallat. Sii leat čatnagasas organisašuvnnain mii gohčoduvvo Etnisk og demokratisk likeverd (jorg. etnalaš ja demokráhtalaš dásseárvu), muhto eamiálbmogiid eksistensii, rivttiide ja boahtteáigái ii leat sadji dan demokratiijas ja dásseárvvus maid sii bealuštit.
Sámediggi reagere maiddái garrasit das, go geahččaledje biehttalit sámi eanaeaiggáda searvat čoahkkimii. Son beasai searvat dainna eavttuin ahte ii daja maidege ja dainna provosere eará čoahkkinoasseváldiid. Diekkár čearddalašvuođa iskan ii gula ođđaáigásaš servodahkii.
Diekkár lágideapmi vearáskahttá debáhttavuoiŋŋa lullisámi áššiin lullisámi guovllus. Sámi jienaid gieldin ja jávohuhttin, dihtomielalaš botnjan ja boasttudieđut ovddidit dušše ovdagáttuid ja rasismma.
Sámediggi lea hui kritihkalaš dasa ahte dákkár rasisma sápmelaččaid vuostá velge gávdno ja dohkkehuvvo almmolašvuođas 2019:s. Sámediggi rámiida Samisk råd Trøndelag jođiheaddji May Britt Lagesen (Bb), go ii searvan lágideapmái.
Sámediggi bivdá stádaministara Erna Solberga ja guovllu ovddasvástideaddji politihkkáriid, ee. Selbu sátnejođiheaddji Ole Morten Balstada (Bb), Tydala sátnejođiheaddji Ole Bjarne Østbya (Gb), Holtålena sátnejođiheaddji Jan Håvard Refsethåsa (Gb), Midtre Gauldala sátnejođiheaddji Sivert Moena (Gb), Stjørdala sátnejođiheaddji Ivar Vigdenesa (Gb), Rørosa sátnejođiheaddji Hans Wintervolda ja Osa sátnejođiheaddji Runa Finboruda čuoldit eret ja ii dohkkehit dákkár vaši ovddideaddji láhttema."
Loga maid: Sámediggepresideanta vuolgá Selbui maŋŋel anti-sámi čoahkkima