Máŋga gieldda jerret mo sii galget sihkkarastit čiegus válgga go vuostáiváldet uhccán jienastagaid.
Sámedikki čoahkkingirjjit eai leat almmolaččat.
Láhkavuođđu dasa ahte sáhttit čiehkat almmolašvuođas, boahtá ovdan Sámediggeválgga láhkaásahusa 15. Kapihttala 81. Paragráfas, geahča almmolašvuođalága § 27.
§ 81. Beassan Sámedikki jienastuslohkui ja ávdnasiidda muđuid – almmolašvuohta
(1) Jus eará ii čuovo lágas dahje láhkaásahusa mearrádusain, de sáhttá beassan Sámedikki jienastuslogu gáhppálagaide dahje daid nubbehusčállosiidda – dás maiddái dasa mii lea geavahuvvon russemii – addit dušše
a) almmolaš virgeolbmo atnui, go adnojuvvo dárbbašlažžan bálvalusa dihtii dahje
b) eráide Sámedikki mieđáhusa mielde.
(2) Beassan jienastuslohkui ja válgaávdnasiidda muđuid sáhttá addit dušše dutkiide dieđalašvuođa várás Sámedikki mieđáhusa mielde.
Sámediggeválgga njuolggadusat dadjet ahte buot ávdnasat válgga oktavuođas leat čihkosis almmolašvuhtii. Dasa leat guokte siva; go válgga vuođđun lea Sámedikki jienastuslohku mii iešalddis adnojuvvo leat hearkkes registtarin, ja go muhtun gielddain/suohkaniin leat uhccán jienastagat mat galget lohkkojuvvot go leat uhccán olbmot gielddas/suohkanis geain lea jienastanvuoigatvuohta.
Áššin lea dat ahte buot gielddat/suohkanat main leat badjel 30 olbmo 2011 jienastuslogus, galget lohkat ieža. Muhtun dáin gielddain/suohkaniin sáhttet boahtit uhccán jienastagat, nu ahte čiegusválgaprinsihppa hástaluvvo go válgastivra galgá čađahit gaskaboddasaš lohkama. Seamma hástalus čuožžila lohkanválgastivrii mii galgá čađahit gaskaboddasaš lohkama daid gielddaid/suohkaniid ovddas, main leat uhcit go 30 olbmo jienastuslogus ja girjet dan.
Beavdegirjjit gullet “válgaávdnasiidda muđui” eai ge dat leat almmolaččat. Jus oktage háliida daid geahččat, de ferte ohcat lobi Sámedikkis geahččat daid beavdegirjjiid.
Vaikke vel gielda/suohkan lea vuostáiváldán uhcit go 20 jienastaga (mii lea bagadeaddji rádji dasa ahte galle jienastaga berre oažžut ovdalgo sáhttá lohkat), de galget gielddat/suohkanat lohkat ovddalgihtiijienastagaid ja válgadiggejienastagaid sierra ja dieđihit SSB:ii. Dat lea vejolaš go boađus SSB ii dieđit bohtosa gieldda-/suohkandásis, dušše válgabiiredásis. Sámediggi addá dáidda gielddaide/suohkaniidda sierralobi lohkat ja čujuha Sámediggeválgga láhkaásahusa 82. paragráfii, mas jávohisvuođageasku boahtá ovdan.
§ 82. Jávohisvuođageatnegasvuohta
(1) Hálddašanlága jávohisvuođageatnegasvuođa mearrádusat gustojit seamma láhkai sámediggeválggas.
(2) Son, guhte veahkeha jienasteaddji jienastettiin ja beassá diehtit, guđe láhkai jienasteaddji lea jienastan, lea geatnegas orrut jienajávohaga dan birra.